Qəzzədəki Kamal Üdvan xəstəxanasının rəhbərinin vəkili onun ürəyində problem olmasına, fiziki və ruhi işgəncələrə məruz qalmasına baxmayaraq, qeyri-insani şəraitdə yeraltı kamerada saxlandığını açıqlayıb.
Xarici KİV-in verdiyi məlumata əsasən, Qəzzədəki Kamal Üdvan xəstəxanasının rəhbəri doktor Həssam Əbu Səfiyyənin vəkili Ğeyd Ğanim Qasim fələstinli məhbusla son görüşündən sonra onun fiziki vəziyyətinin çox ağır olduğunu açıqlayıb.
O, qeyd edib ki, əsir olarkən çəkisi 100 kiloqram olub, amma indi 40 kiloqrama yaxın arıqlayıb.
Qəzzənin ağ xalatlı qəhrəmanı kimi tanınan fələstinli həkimin vəkili deyib: Onun ağır çəki itirməsi ağır həbsxana şəraiti və işğalçı rejim tərəfindən göstərilən tibbi xidmətin olmamasının nəticəsidir. Əbu Səfiyə yarım saat ərzində şiddətli döyülməyə məruz qalıb; sinəsinə, üzünə, başına və boynuna zərbələr endirilib. Lakin həbsxana rəsmiləri ona tibbi xidmət göstərməkdən və ya mütəxəssis həkimə müraciət etməkdən imtina ediblər.
Vəkilin sözlərinə görə, Əbu Səfiyə ürək ritminin pozulmasından əziyyət çəkir və qəsdən tibbi səhlənkarlığın qurbanıdır. İstidə belə qış paltarı geyinməyə məcbur edilir, işgəncələrə, aclığa, karserə məruz qalır.
Qasim onu da vurğulayıb ki, Əbu Səfiyənin saxlandığı kamera yeraltıdır və o, günəş işığından tamamilə məhrumdur və bu vəziyyət onun fiziki və ruhi vəziyyətinin getdikcə pisləşməsinə səbəb olub.
Fələstinli Əsirlərin İşləri üzrə İnformasiya İdarəsi Aprelin əvvəlində bəyan edib ki, İsrailin Beer Şeva məhkəməsi məşhur fələstinli həkimin “qanunsuz döyüşçü” kimi altı ay müddətində həbsdə saxlanmasını təsdiqləyib.
İşğalçılar 2002-ci ildə fələstinliləri məxfi sənədlər əsasında heç bir ittiham olmadan və ya ədalətli mühakimə olmadan həbs etmək üçün “qeyri-qanuni döyüşçülər” qanununu qəbul ediblər və 2005-ci ildən bəri məhkəmə nəzarəti və göndəriş hüququ olmadan Qəzzə sakinlərini sıxışdırmaq üçün istifadə edirlər.
Qəzzənin şimalındakı Kamal Üdvan xəstəxanasının rəhbəri müharibə və İsrailin hücumları zamanı yeniyetmə oğlu İbrahimin şəhadətinə və hava hücumunda özünün yaralanmasına baxmayaraq, tibb məntəqəsini tərk etməkdən imtina edib. Kritik anlarda və şəxsi müalicə ehtiyacına baxmayaraq, o, uşaqların və yaralıların müalicəsini davam etdirmiş, hətta gülləbaran və bombardmanlar altında belə həkim andına sadiq qalaraq xəstəxanada oğlunun cənazə namazını qılmışdır.
Əlaqədar xəbərlər
