Qəzza zolağında aclıq dəhşətli şəkildə dərinləşir. İsrail işğalının 145 gündən çoxdur ki, bütün keçid məntəqələrini tamamilə bağlaması və qida, dərman, o cümlədən uşaq südü kimi yardım vasitələrinin daxil olmasına mane olması, blokadadakı bölgədə humanitar vəziyyətin tamamilə çökməsinə səbəb olub.
Qəzza zolağındakı Hökumət Media Ofisinin verdiyi məlumata görə, aclıq və qidalanma çatışmazlığı səbəbilə indiyədək 115-dən çox ölüm hadisəsi qeydə alınıb. Qurum xəbərdarlıq edir ki, bu vəziyyət davam edərsə, fəlakət daha da ağırlaşacaq.
Rəqəmlərə əsasən, əhalisi 2.4 milyonu keçən Qəzza zolağında yaşayan insanlar humanitar vəziyyətin tam çöküşünü önləmək üçün həftəlik ən azı 500 min kisə una ehtiyac duyurlar.
Digər tərəfdən, Hökumət Media Ofisi, bəzi bölgə xaricindən olan fəalların dili ilə yayılan və “aclığın sona çatdığı” və “yüzlərlə yardım maşınının gəldiyi” iddialarının tamamilə yalan və yaldadıcı olduğunu bildirərək xəbərdarlıq edib. Yerli mənbələr bu məlumatları tam şəkildə təkzib edib və bu rəvayətlərin İsrailin təbliğatı ilə təhlükəli şəkildə üst-üstə düşdüyünü, həqiqəti təhrif etməyi və davam edən cinayətə qarşı xalq və beynəlxalq təzyiqləri azaltmağı hədəflədiyini qeyd ediblər.
Qurum bildirib ki, Qəzza zolağında qida, su və dərman baxımından tam qıtlıq hökm sürür və yayılan görüntülərdəki “simvolik və ya seçmə” yardım səhnələri, əhalinin aylarla davam edən fəlakətli həyat şəraitini əks etdirmir.
Yerli qurumlar beynəlxalq ictimaiyyəti və donor ölkələri dərhal blokadanı qırmağa və humanitar yardımların, xüsusilə uşaq südü və əsas qida məhsullarının daxil olması üçün keçidlərin daimi olaraq açılmasına çağırıb. Bildirilib ki, keçidlərin bağlı qalması daha çox qurban və kütləvi aclıq deməkdir.
Fələstin xalqına və dünyanın müxtəlif yerlərindəki ictimaiyyətə, eləcə də media orqanlarına müraciət olunaraq yalnış rəvayətlərin arxasınca getməməyə, əksinə həqiqəti üzə çıxarmağa, Qəzzada davam edən iztirabları dünyaya çatdırmağa və bu yavaş-yavaş davam edən qətliamı dayandırmaq üçün məsuliyyətli davranmağa çağırış edilib.
Daha əvvəl fəal Mahmud Zueytir bildirib ki, dünən heç bir iordaniyalı yardım daxil olmayıb və əgər daxil olubsa belə, bu, bir məhəlləyə belə kifayət etməz. O əlavə edib ki, bəzi dairələrin humanitar yüngülləşmə olduğunu iddia etməsinə baxmayaraq, aclıq hələ də davam edir.
Bu kontekstdə bir çox fəal fələstinli aşpaz Əbu Cülyanı Qəzzadakı humanitar vəziyyətlə bağlı “yalan danışmaqda və ictimaiyyəti aldatmaqda” ittiham edib və “#Əbu_Cülya_Yalançıdır” həştəqi ilə kampaniya başladıb. Onlar bildiriblər ki, Qəzzanın gündəlik ehtiyac duyduğu yardımların cəmi 1%-dən azı faktiki olaraq əraziyə çatır, milyonlarla insan isə aclığın bir addımlığındadır.