Cümə günü Qəzza zolağının Hökumət Media İdarəsi yeni və dəhşətli bir cinayət barədə xəbərdarlıq edib: ABŞ-İsrail nəzarəti altında fəaliyyət göstərən, xalq arasında “ölüm tələləri” kimi tanınan yardım mərkəzlərindən gələn un kisələrinin içində narkotik pereparatlar (həblər) tapılıb.
İdarənin bəyanatına görə, fələstinlilər həmin mərkəzlərdən paylanan un kisələrinin içində Oxycodone tipli təhlükəli narkotik maddələr aşkar ediblər.
İndiyədək ən azı dörd belə halın sənədləşdirildiyi qeyd olunub; bəyanatda vurğulanıb ki, bəzi hallarda bu maddələr bilərəkdən unun tərkibinə qarışdırılmış və ya həll edilmiş ola bilər, bu isə cinayətin təhlükəsini ikiqat artırır və fələstinlilərin sağlamlığı üçün birbaşa təhdid yaradır.
Media İdarəsi bu ağır hadisənin planlı bir siyasətin tərkib hissəsi olduğunu, fələstin cəmiyyətini daxildən dağıtmaq və narkomaniya yaymaqla psixoloji və yumşaq müharibə aparmaq məqsədi daşıdığını bildirib. Yardımlara narkotik maddələrin daxil edilməsi beynəlxalq humanitar hüququn açıq pozuntusu və tamhüquqlu müharibə cinayəti kimi qiymətləndirilib.
Bəyanatda “ABŞ-İsrail yardım mərkəzləri”nin Qəzzada kütləvi tələ və mülki əhalini öldürmə vasitəsinə çevrildiyi vurğulanıb; son bir ay ərzində həmin mərkəzlərə yardım almağa çalışan 549 fələstinli şəhid olub, 4,066 nəfər yaralanıb və 39 nəfər itkin düşüb.
Media İdarəsi Qəzza sakinlərini bu mərkəzlərdən gələn hər cür qida məhsullarına qarşı maksimum ehtiyatlı davranmağa, alınan məhsulları diqqətlə yoxlamağa və hər hansı şübhəli hal aşkarladıqda dərhal xəbər verməyə çağırıb. Həmçinin ailələrə uşaqlarını bu mərkəzlərin təhlükələri və narkotiklərin cəmiyyətə səssiz hücum vasitəsi kimi istifadəsi barədə maarifləndirməyin vacibliyi vurğulanıb.
Bəyanatda beynəlxalq ictimaiyyət, xüsusilə BMT İnsan Haqları Şurası və Beynəlxalq Cinayət Məhkəməsi dərhal müdaxiləyə, bu mərkəzlərin fəaliyyətinin dayandırılmasına və fələstinli mülki əhaliyə qarşı törədilən cinayətlərin araşdırılmasına çağırılıb. Yardımların təhlükəsiz çatdırılması üçün yeganə düzgün yolun yalnız BMT-nin rəsmi qurumları, ilk növbədə UNRWA vasitəsilə həyata keçirilməsi gərəkdiyi qeyd olunub.
Media İdarəsi bəyanatını fələstinli mülki vətəndaşların qorunmasının milli prioritet olduğunu vurğulayaraq, məsul qurumların bu ağır pozuntuları ifşa etməyə və günahkarların həm yerli, həm də beynəlxalq səviyyədə məsuliyyətə cəlb olunmasına davam edəcəyini bildirib.
