“Reuters” agentliyi 25 iyul, cümə günü, ABŞ Beynəlxalq İnkişaf Agentliyi (USAID) tərəfindən aparılmış və əvvəllər dərc olunmamış gizli daxili təhlilin nəticələrini açıqlayıb. Təhlil göstərir ki, işğalçı və Ağ Evin, ABŞ tərəfindən maliyyələşdirilən və Qəzza zolağına yönəldilən humanitar yardımların HƏMAS tərəfindən sistemli şəkildə oğurlandığı barədə irəli sürdüyü iddiaları təsdiqlənmir.
USAID-in Humanitar Yardım Departamenti tərəfindən 2025-ci ilin iyun ayının sonunda tamamlanan araşdırma, 2023-cü ilin oktyabrı ilə 2025-ci ilin mayı arasında Qəzzada baş verən ABŞ yardımlarının 156 oğurluq və ya itki hadisəsini nəzərdən keçirib və bu halların heç birində HƏMAS-ın bu yardımlardan faydalandığını göstərən hesabat qeydə alınmayıb.
Buna baxmayaraq, ABŞ Dövlət Departamentinin sözçüsü bu nəticələrlə razılaşmayaraq, HƏMAS-ın yardımlara əl qoyduğunu göstərən video kadrların mövcud olduğunu iddia edib, lakin heç bir sübut təqdim etməyib. O həmçinin bəzi humanitar təşkilatları “yardımların paylanmasındakı korrupsiyanı gizlətməkdə” ittiham edib.
Mənbələrin bildirdiyinə görə, aclıq böhranının Qəzzada daha da dərinləşdiyi bir vaxtda, təhlilin nəticələri artıq USAID-in Baş Müfəttiş Ofisinə və Dövlət Departamentinin rəsmilərinə təqdim edilib. Dünya Ərzaq Proqramının təxminlərinə görə, zolaqdakı fələstinlilərin təxminən dörddə biri aclığa bənzər şəraitdə yaşayır. Ümumdünya Səhiyyə Təşkilatı və tibbi sənədlər isə uşaqların aclıqdan ölüm hallarını qeydə alır.
Araşdırma, 156 yardım itkisi və ya oğurluq hadisəsindən 44-nün birbaşa və ya dolayısı ilə işğalçı ordunun məsuliyyətində olduğunu müəyyənləşdirib. Bu hallardan 11-i hava zərbələri və ya təxliyə əmrlərinin nəticəsi olub. Hesabat həmçinin göstərib ki, işğalçı hakimiyyət təşkilatları xəbərdarlıqlara baxmayaraq, yardımların çatdırılması üçün təhlükəli marşrutlardan istifadə etməyə məcbur edib.
İşğalçının HƏMAS-ın yardımlara nəzarət etdiyi, onları yenidən satdığı və ya döyüşçülərinə yönəltdiyi barədə iddialarına baxmayaraq, araşdırma müəyyən edib ki, oğurluq hadisələrinin əksəriyyəti naməlum tərəflər və ya silahlı dəstələr tərəfindən həyata keçirilib və heç bir hadisə birbaşa HƏMAS-la əlaqələndirilməyib.
Hesabat həmçinin qeyd edib ki, bəzi təşkilatlar ABŞ maliyyələşməsini itirməmək üçün, məqsədli şəkildə, oğurluqları “təyin olunmuş qrupların” üzərinə yıxa bilər. Təqdim olunan diaqramlar göstərib ki, hadisələrin əksəriyyətində günahkarların müəyyən olunması üçün sistemin olmaması səbəbindən, böyük hissə heç bir tərəfə aid edilməyib.
“Reuters”in açıqlamasına görə, ABŞ Beynəlxalq İnkişaf Agentliyi (USAID) Tramp administrasiyasının agentliyi ləğv etməyə və funksiyalarını Dövlət Departamentinə keçirməyə başlamasından sonra gizli sistemlərə çıxışını itirib. ABŞ kəşfiyyat qiymətləndirmələri ilə tanış bir mənbə də bildirib ki, HƏMAS-ın yardımları oğurladığına dair heç bir gizli hesabat yoxdur və ABŞ administrasiyası əsasən İsrailin iddialarına güvənir.
Bu hesabat, 7 oktyabr 2023-cü ildən bəri ABŞ dəstəyi ilə İsrailin Qəzza zolağında davam etdirdiyi aclıq və soyqırım müharibəsi fonunda açıqlanıb. Bu müddət ərzində 60 minə yaxın fələstinli, əsasən qadınlar və uşaqlar, şəhid edilib, yüz minlərlə yaralı, itkin və didərgin qeydə alınıb. Bütün bunlar isə ağır mühasirə və həyatın bütün sahələrinin tamamilə çökməsi fonunda baş verir.