7 oktyabrdan bəri İsrailin müharibə cinayətlərini sənədləşdirmək üçün xarici mətbuatın Qəzza zolağına girişinə maneə törədilməsinə baxmayaraq, İsrail işğalçı qüvvələri son zamanlarda mülki qurumların və beynəlxalq media nümayəndələrinin Qəzzaya girişinə ciddi məhdudiyyətlər qoyub və onları hərbi senzura altında saxlayır. Bu barədə ivritdilli “Walla” saytı məlumat verib. Məhdudiyyətlərin məqsədi, Qəzzadakı fəlakətli vəziyyətin və İsrailin müharibə cinayətlərinin üzə çıxmasının qarşısını almaqdır.
İsrailin qərarı, zolaqda həyata keçiriləcək bütün mülki fəaliyyətlərin İsrailin hərbi və təhlükəsizlik qurumları ilə ciddi koordinasiya və nəzarət altında olmasını təmin edir. Bu addım, guya “dövlətin maksimum təhlükəsizliyini qorumaq və humanitar icazələrin sui-istifadə olunmasının qarşısını almaq” adı ilə əsaslandırılır.
Məhdudiyyətlərə görə, sektora peşəkar şəxslərin, yardım təşkilatlarının və beynəlxalq nümayəndə heyətlərinin girişi üçün sərt qeydiyyat və icazə prosedurları tətbiq olunur. Bu prosedurlara bütün iştirakçıların adlarının, fəaliyyətin məqsədinin, onların daşıdıqları texnoloji vasitələrin, əlaqə vasitələrinin və avadanlıqların, eləcə də fəaliyyətə məsul müşayiətçi qurumun adının təqdim edilməsi daxildir.
Bu məhdudiyyətlərin icrasını İşğal altındakı Ərazilərdə Hökumət Fəaliyyətlərini Koordinasiya Ofisi (COGAT), İsrail ordusunun Cənub Komandanlığı və ŞABAK həyata keçirir. Hər bir icazə ciddi təhlükəsizlik yoxlamasından keçir və ordu, öz iddiasına görə, hər hansı qayda pozuntusu aşkar edərsə, icazəni istənilən mərhələdə ləğv edə bilər.
Məhdudiyyətlər həmçinin, “şübhəli avadanlığın keçirilməsinin, həssas məlumatların sızmasının və ya təsdiqlənməmiş yerli fəaliyyətlərin” qarşısının alınmasını nəzərdə tutur.
Sektora girmək istəyən qurumlar İsrail təhlükəsizlik orqanlarını əvvəlcədən bütün fəaliyyətlər barədə, o cümlədən ətraflı hesabatlarla məlumatlandırmağa məcburdur.
Hüquqşünaslar bildirirlər ki, “Qəzza və Livana mülki şəxslərin girişinə dair İsrail ordusunun şəffaflığının olmaması cinayətkar səhlənkarlıqdır. Prosedurların ictimaiyyətə və hətta əsgərlərə açıq şəkildə elan edilməməsi insan ölümlərinə səbəb olub və həyati risklər yaradıb.”
“Walla”nın məlumatına görə, müharibənin başlanğıcından bəri İsrail, beynəlxalq və yerli media orqanlarının Qəzzadakı hadisələri işıqlandırmasına icazə vermir, beynəlxalq tənqidlərə baxmayaraq.
Keçən həftə İsrail Knesseti, məhkəmə təsdiqi olmadan xarici media yayımını bağlamağa imkan verən qanun layihəsinin ilkin hazırlanmasını təsdiqləyib və onun birinci oxunuşda səsverməyə çıxarılması planlaşdırılır. Bununla yanaşı, İsrail Ali Məhkəməsi bir neçə ərizəni rədd edib və jurnalistlərin sektora girişinə icazə verməyib.