Cümə günü səhər saatlarından başlayaraq sionist işğalçı ordu Qəzzə zolağının müxtəlif bölgələrinə yeni hava, artilleriya və dəniz hücumları həyata keçirib. Nəticədə isə onlarla fələstinli mülki şəxs həyatını itirib və ya yaralanıb.
Xarici KİV-in cümə günü Fələstin İnformasiya Mərkəzinə istinadən verdiyi xəbərə görə, İsrail döyüş təyyarələri Xan Yunisin qərbindəki əl-Məvasi bölgəsində əl-Əmal məhəlləsini və əl-Əqsa Universitetinə bitişik əraziləri hədəf alıb.
Məlumata görə, 5 nəfərin şəhid olması, 20-dən çox insanın yaralanması ilə nəticələnən ərazidəki qaçqın çadırlarına hücumdan sonra genişmiqyaslı yanğın baş verib.
Xan Yunisin əş-Şəfii bölgəsində Əbu Səhlul ailəsinin evi də hədəfə alınıb, nəticədə bir neçə nəfər şəhid olub və bir neçə nəfər yaralanıb.
Bu arada Qəzzə şəhərinin şərqində işğalçı ordunun yaşayış binalarını qəsdən partlatmasından dəhşətli partlayış səsləri eşidilib.
Qəzzə şəhərinin şərq və qərb bölgələri də işğalçı qüvvələrin artilleriya atəşinə məruz qalıb.
Qəzzə zolağının mərkəzinə də güclü hava zərbəsi endirilib. Qəzzənin mərkəzindəki Nuseyrat düşərgəsi də artilleriya hücumlarına məruz qalıb.
Bu, İsrail hərbi gəmilərinin də Qəzzənın qərb sahillərini hədəf aldığı bir vaxtda baş verib.
Məlumata görə, sionist rejimin Qəzzə zolağına təcavüzünün davam etməsi ilə 2023-cü il Oktyabrın 7-dən və Əqsa tufanı əməliyyatının başlanmasından bu yana bölgədə şəhidlərin ümumi sayı 58 667 nəfərə çatıb.
Bu müddət ərzində 139 974 nəfər də yaralanıb.
Birləşmiş Millətlər Təşkilatının Fələstinli Qaçqınlara Yardım və İşlər üzrə Agentliyinin (UNRWA) media müşaviri daha əvvəl Qəzzədəki fəlakətli vəziyyətlə bağlı məlumat vermiş və Qəzzədə yüz minlərlə insanın aclıq və xəstəlikdən əziyyət çəkdiyini açıqlamışdı.
Əlaqədar xəbərlər
