Son bir neçə saat ərzində İsrailin döyüş təyyarələri və artilleriyasının Qəzzə zolağının müxtəlif bölgələrinə, xüsusilə Xan Yunis, Cəbaliya, əl-Bureyc və Qəzzə şəhərinə güclü hücumlar dalğası həyata keçirib və nəticədə onlarla fələstinli şəhid olub və yaralanıb.
Fələstin İnformasiya Mərkəzinin məlumatına görə, İsrail rejimi “Məvasi”dəki qaçqın düşərgələrinə və Xan Yunisdəki “Əbu Musi” və “Əl-Huvabi” məscidləri yaxınlığındakı qaçqın düşərgələrinə bir neçə hücum həyata keçirib və nəticədə qadın və uşaqlar da daxil olmaqla, çox sayda mülki şəxs şəhid olub və yaralanıb.
Bu arada xəbər agentliklərindən biri bildirib ki, şənbə günü İsrail ordusu hərbiçiləri Qəzzə zolağının cənubunda yerləşən Xan Yunis şəhərinin ət-Tina küçəsində humanitar yardım paylama mərkəzində yardım almaq üçün cərgədə olan fələstinlilərə atəş açıb, nəticədə 25 nəfər şəhid olub, 100-dən çox insan isə yaralanıb.
Daha əvvəl tibb mənbələri Xan Yunisin cənubundakı ət-Tina küçəsində humanitar yardım alanların cərgələrinə hücum nəticəsində 12 nəfərin şəhid olduğunu, 100-dən çox insanın isə yaralandığını və Nasir xəstəxanasına köçürüldüyünü açıqlamışdı.
Bundan əlavə İsrail döyüş təyyarələri Xan Yunisin şimalında, Qəzzə şəhərinin şərq və qərbində və Cəbaliyanın şərqində yerləşən “əs-Satr əl-Qərbi”də fələstinlilərin yaşayış evlərini hədəfə alıb. Ordu artilleriyası əl-Bureyc və Cəbaliya düşərgələrinin şərq ərazilərini də atəşə tutub.
İsrail pilotsuz təyyarələri də Şeyx Rizvan Gölü, Əbu İskəndər və Cəbaliya ərazilərinə onlarla bomba atıb. Hesabatlar Qəzzənin şərqindəki ət-Tuffah məhəllələrində ardıcıl partlayışların baş verdiyini və yaşayış məntəqələrinin geniş şəkildə dağıldığını göstərir.
Xilasetmə qrupları Qəzzənin qərbindəki əş-Şati düşərgəsində Nassar ailəsinin evinin dağıntıları altından şəhid bir uşağın cəsədini çıxarıb.