Bu gün – şənbə səhəri, Qəzza şəhərində 35 günlük körpə Cavad əl-Ənqər ağır qidalanma çatışmazlığının yaratdığı fəsadlar səbəbilə şəhid olub. Bu, son 24 saat ərzində baş verən ikinci belə haldır və bu, Qəzza zolağında fələstinlilərin yaşadığı humanitar fəlakətin dərinləşdiyini göstərir.
Əş-Şifa xəstəxanasındakı tibbi mənbə təsdiqləyib ki, körpənin vəfatı aclıq, qida çatışmazlığı və zəruri tibbi yardımın olmaması fonunda sağlamlıq durumunun kəskin şəkildə pisləşməsi nəticəsində baş verib. Qeyd olunub ki, səhiyyə sistemi artıq minimal ehtiyacları belə qarşılamaq iqtidarında deyil.
Qəzzadakı Hökumət Media İdarəsinin məlumatına əsasən, aclıq və qidalanma pozuntuları səbəbilə şəhid olan uşaqların sayı 70-ə çatıb. Ümumilikdə isə qida və dərman çatışmazlığı nəticəsində həyatını itirənlərin sayı müharibənin başlanmasından bu yana 620 nəfərə yüksəlib.
Dünən – cümə günü isə bir yaş yarım olan körpə Səna əl-Ləhhəm, Qəzza zolağının mərkəzində yerləşən Deyr əl-Bəlah şəhərində ağır qidalanma çatışmazlığı səbəbilə həyatını itirmişdi. Bu hadisə İsrail ordusunun tətbiq etdiyi tam blokada və məqsədli aclıq siyasəti altında yaşayan fələstinlilərin üzləşdiyi humanitar faciəni açıq şəkildə nümayiş etdirir.
Qəzza Səhiyyə Nazirliyi təsdiqləyib ki, təcili yardım bölmələri hər gün fərqli yaş qruplarından aclıq və həddindən artıq zəiflik halları ilə üzləşən, misli görünməmiş sayda xəstəni qəbul edir. Nazirlik xəbərdarlıq edib ki, yüzlərlə fələstinlinin orqanizmi artıq dözümlülük həddini aşaraq ölüm təhlükəsi ilə qarşı-qarşıyadır.
Əş-Şifa xəstəxanasının direktoru Dr. Məhəmməd Əbu Səlimiyə isə bildirib ki, tibb heyətləri hər gün aclıq simptomları ilə üzləşən yüzlərlə pasiyenti müalicə edir – onlarda əsasən ağır yorğunluq, yaddaş itkisi və qidalanma pozuntuları müşahidə olunur. Onun sözlərinə görə, hazırda Qəzzada 17 mindən çox uşaq təhlükəli səviyyədə qidalanma problemi yaşayır.
BMT-nin Fələstinli Qaçqınlara Yardım və İş Agentliyi (UNRWA) isə daha əvvəl xəbərdarlıq etmişdi ki, mart-iyun ayları arasında beş yaşdan aşağı uşaqlar arasında qidalanma pozuntularının səviyyəsi ikiqat artıb. Bu vəziyyət İsrailin sərt blokadası və həyati əhəmiyyətli ehtiyacların daxil olmasının qarşısının alınması səbəbindən yaranıb.
Beynəlxalq xəbərdarlıqlara baxmayaraq, bu humanitar böhrana hələ də effektiv cavab verilməyib. İsrail hakimiyyəti martın 2-dən bəri keçid məntəqələrini bağlı saxlayır və ərzaqla dərmanların daxil olmasına imkan vermir. Bu səbəbdən BMT-nin rəsmi hesabatlarında da qeyd olunduğu kimi, Qəzza “tam aclıq mərhələsinə” daxil olub.
2023-cü il 7 oktyabrdan bəri İsrail, ABŞ-ın birbaşa dəstəyi ilə, Qəzza zolağında fələstinlilərə qarşı soyqırım həyata keçirir. Bu, qətliam, aclıq, dağıntı və zorla köçürməni əhatə edir və bu cinayətlər beynəlxalq çağırışlara və Beynəlxalq Ədalət Məhkəməsinin hücumların dayandırılması barədə qərarlarına rəğmən davam edir.
Bu soyqırım nəticəsində indiyədək 198 mindən çox fələstinli qadın, uşaq və yaşlı arasında olmaqla ya şəhid olub, ya da yaralanıb. 11 mindən çox insan itkin düşüb. Yüz minlərlə insan məcburi köçkünə çevrilib və çoxlu sayda uşaq aclıqdan həyatını itirib. Eyni zamanda, Qəzza zolağında həyatın bütün sahələri məhv olunub.