İsrail işğalçı ordusu və məskunlaşan yəhudi dəstələri İordan çayının qərb sahili və şimal-şərqi Əl-Ğovar bölgəsində fələstinlilərə qarşı hücumlarını davam etdirir. Bu hücumlar sistemli şəkildə həyata keçirilir — məqsəd repressiya, məcburi köç, torpaq zəbti və Fələstinlilərin həyatı və mülkiyyətinə qarşı hücumdur. Bu siyasət, ifrat sağçı İsrail hökumətinin qeydsiz-şərtsiz dəstəyi ilə icra olunur.
Bu gün, cümə günü səhər saatlarında İsrail ordusu işğal altındakı şəhər və kəndlərə reydlər təşkil edərək, silahlı hücumlar, ev basqınları və kütləvi həbslər həyata keçirdi. Nablus şəhərində işğalçılar qərb qəbiristanlığı ətrafına daxil olub canlı güllə ilə atəş açdılar və gənc Fadi Əbu Şərxi yaraladıqdan sonra onu həbs etdilər. Qırmızı Aypara təcili yardım qruplarının ona yaxınlaşmasına icazə verilmədi. Daha sonra, Nablusun şərqində yerləşən Əskər əl-Cədid düşərgəsinə reyd edən İsrail əsgərləri Əhməd əl-İsəvini evində axtarış apardıqdan sonra həbs etdilər.
Tülkərəm vilayətində, Kəfr Cəməl kəndindən gənc İbrahim əl-Cihad həbs olundu. Həmin vaxt Kəfərat bölgəsinin digər kəndləri — Kəfr Cəməl, Kəfr Zibad, Kəfr Ubbuş və Kəfr Sur da genişmiqyaslı reydlərə məruz qaldı. Bu kəndlərdə onlarla evə hücum edildi və bir çoxu hərbi mövqeyə çevrildi.
Ramallahın şimal-qərbində yerləşən Beyt Rima kəndində, işğalçılar 21 yaşlı Əla Fəvzi ər-Rimavini evinə reyd edərək həbs etdilər. Eyni zamanda, işğal altındakı Əl-Ğovarın şimal-şərqində yerləşən əl-Malih qəsəbəsində, məskunlaşmış yəhudi dəstələri ordu dəstəyi ilə Tareq Kəəbənənin evinə hücum etdi. Bu hücum nəticəsində Tareq, Əbd və Əli Kəəbənə həbs olundu.
Cənubdakı əl-Xəlil şəhərinin Dura bölgəsində, İsrail əsgərləri bir yaşayış binasını boşaldaraq, orada yaşayan fələstinliləri evdən çıxardı və binanı hərbi baza olaraq istifadə etməyə başladı. Bu da məcburi köçürmə və mülki mülkiyyətə əl qoyma siyasətinin bir hissəsi idi.
İşğal altındakı Qüds şəhərində isə işğalçı qüvvələr Şeyx Cərrah məhəlləsində bir qrup qadını saxlayaraq yenidən təzyiq siyasətinə əl atdı. Həmin məhəllədə yaşayan fələstinlilər daim məcburi köç təhlükəsi ilə üz-üzədir. Eyni zamanda, İsrail 2022-ci ildən bəri həbsdə olan Aqəbə Cəbr düşərgəsindən olan Sami Attanı azad edib.
Əl-Ğovar bölgəsində baş verənlər isə xüsusilə diqqət çəkir. Cümə gecəsi və bu gün səhər saatlarında, silahlanmış yəhudi məskunlaşmaçıları İsrail ordusunun mühafizəsi altında əl-Malih kəndində fələstinlilərə və onların mal-qarasına qarşı vəhşi hücumlar həyata keçirdi.
Əl-Malih kənd şurasının rəhbəri Mehdi Daragma bildirib ki, məskunlaşmaçılar 350 baş qoyunu oğurlayıb, onların ən azı 117-ni bıçaq və güllə ilə qətlə yetiriblər. Hadisə kəndin yaxınlığındakı əş-Şəq bölgəsində baş verib.
Daragma onu da bildirib ki, bu hücumlar zamanı fələstinlilərə məxsus əmlaklar dağıdılıb, kənd sakinləri döyülüb və torpaqlarından zorla çıxarılmağa çalışılıb. İsrail ordusu isə kənddən üç fələstinlini gözləri bağlanmış və qolları bağlı halda saxlayıb və daha sonra sərbəst buraxıb.
Əl-Malih bölgəsi, şimal-şərqi Əl-Ğovarda yerləşən 21 fələstinli yaşayış məntəqəsindən biridir. Bu ərazi işğalçı dövlətin və məskunlaşmaçı dəstələrin daim hədəfindədir. 72,000 hektarlıq bu bölgənin 40,000 hektara İsrail ordusu hərbi məqsədlərlə əl qoyub. Qərb sahilindəki kənd təsərrüfatı ərazilərinin 50 faizi bu bölgəyə düşür.
Hazırda Əl-Ğovar bölgəsində 11 mindən çox fələstinli yaşayır. Onlar istənilən an zorla köçürülə biləcəkləri təhlükəsi ilə üz-üzədirlər. Bu vəziyyət İsrailin 2022-ci ilin sonunda iqtidara gələn ifrat sağçı hökumətinin açıq şəkildə məskunlaşmanı və torpaq zəbtini dəstəkləməsi fonunda daha da təhlükəli xarakter alıb. Oslo razılaşmasına əsasən “C” zonası olaraq tanınan bu bölgələrdə, Fələstin Muxtariyyətinin hüquqlarını müdafiə etməsi isə tamamilə passiv və təsirsiz qalır.
Əlaqədar xəbərlər
