İşğalçı İsrail ordusu 17 iyul səhərdən günorta saatlarınadək Qəzzanın müxtəlif bölgələrində mülki şəxslərə qarşı vəhşicəsinə hücumlarını davam etdirib, nəticədə onlarla insan şəhid olub. Bombardman nəticəsində bir kilsə hədəfə alınıb, kilsənin yepiskopu yaralanıb, bir neçə nəfər şəhid olub.
Real-israil saytının məlumatına görə, Qəzza müharibəsinin 650-ci günündə işğalçı İsrail ordusunun qeyri-insani hücumları davam edir. Səhər saatlarından bəri həyata keçirilən hücumlarda onlarla günahsız insan həlak olub.
Fələstin mənbələri bildirir ki, səhər saatlarında İsrailin pilotsuz təyyarələrinin Qəzza zolağının şimalına endirdiyi hava zərbələri nəticəsində səkkiz mülki şəxs şəhid olub.
Eyni zamanda, Qəzza şəhərinin şərqində yerləşən Əz-Zeytun və Ət-Tuffah məhəllələrinin bombalanması nəticəsində də bir neçə mülki şəxs həyatını itirib və yaralanıb. Bu vaxt cənubda, Xan Yunus şəhərinin mərkəzində artilleriya atəşləri və evlərin dağıdılması davam edib.
Əl-Bureyc düşərgəsində yerləşən məcburi köçkünlərin sığındığı məktəbin bombardmanı nəticəsində isə beş nəfər şəhid olub, bir neçə nəfər yaralanıb.