Livan mediası dünən (17 iyul) səhər saatlarından etibarən işğalçı rejimin Livanın müxtəlif bölgələrinə qarşı hücumlarını davam etdirdiyini və PUA-larla Nabatiyyə bölgəsində bir avtomobili, Naqura şəhərində isə bir yük maşınını hədəfə aldığını bildirib. Hücum nəticəsində 2 nəfər şəhid olub, bir neçə nəfər yaralanıb.
Real-israil saytının məlumatına görə, sionist rejim atəşkəs razılaşmasını və 1701 saylı BMT qətnaməsini davamlı şəkildə pozaraq bu gün səhər saatlarından etibarən Livana qarşı yeni hücumlar həyata keçirib.
Livan mediası işğalçı rejimin cənub Livanda Tul–Kəfur yolunda bir avtomobili PUA ilə hədəfə aldığını yazıb.
Livan Səhiyyə Nazirliyinin İctimai Səhiyyə Təcili Yardım Mərkəzi verdiyi bəyanatda bildirib ki, Nabatiyyə bölgəsində Tul–Kəfur yolunda İsrailin PUA hücumu nəticəsində bir nəfər şəhid olub, iki nəfər isə yaralanıb.
Əl-Mənar telekanalının müxbiri isə başqa bir xəbərdə sionist rejimin hərbi helikopterinin Naqura bölgəsində bələdiyyə binasının qarşısına bomba atdığını bildirib.
Eyni zamanda Naqura şəhərində İsrailin PUA hücumu nəticəsində bir yük maşını hədəfə alınıb və nəticədə bir nəfər şəhid olub.
Livan mediası İsrail PUA-larının Beyrut və onun cənub ətrafı üzərində alçaqdan intensiv uçuşlar etdiyini də qeyd edib.
Digər tərəfdən, Livanın rəsmi xəbər agentliyi məlumat verib ki, bu gün səhər saatlarında sionist rejimin ordusu cənub Livanın Hula şəhərinin şərq məhəlləsində bir binanı partladıb.
Bu hücumlar sionist rejimin atəşkəsi pozmaqda davam etdiyini bir daha göstərir. ABŞ isə Livan rəsmilərinə müqavimət qüvvələrinin silahsızlaşdırılması üçün təzyiqlər göstərməkdədir. Lakin bu məsələ Livan xalqı və Hizbullah rəsmilərinin sərt reaksiyasına səbəb olub. Onlar bildiriblər ki, müqavimətin silahı Livanın müdafiəsidir və bu silahdan heç vaxt imtina etməyəcəklər.