Qəzza Zolağının cənubunda yerləşən “SDS3” adlı yardımlaşma mərkəzində baş verən faciəvi insident nəticəsində 21 fələstinli həyatını itirib, onlarla insan isə yaralanıb. Qəzzadakı Hökumət Media Ofisinin açıqlamasına görə, bu, İsrail ordusu və ABŞ-ın dəstəklədiyi GHF (Qəzza Humanitar Fondu) tərəfindən həyata keçirilən “yardım” adı altında planlı bir qətliam idi.
Açıqlamada bildirilir ki, minlərlə ac insan yardımı almaq üçün dəvət edildikdən sonra dar dəmir dəhlizlərə salınıb, qapılar bağlanaraq qaçış imkanı qəsdən məhdudlaşdırılıb. Ardınca GHF əməkdaşları və işğalçı əsgərlər ac insanlara qarşı gözyaşardıcı qaz və atəş açıb. Nəticədə insanların bir qismi boğularaq, digərləri isə açılan atəş nəticəsində şəhid olub.
Hadisə yerində olan 14 şahidin ifadələri rəsmi açıqlama ilə tam üst-üstə düşür. Qurum, GHF-nin bu cür insidentləri fələstinli qrupların və ya fərdlərin üzərinə atmaq cəhdini “ağlabatan olmayan, məsuliyyətdən yayınmaq üçün edilən təhlükəli yalan” adlandırır.
Bəyanatda qeyd olunur ki, bu tək hadisə deyil – GHF-nin iş metodları nəticəsində indiyədək 870-dən çox fələstinli şəhid olub, minlərlə insan yaralanıb və onlarla şəxs itkin düşüb. Hökumət Media Ofisi GHF-ni “saxta humanitar örtük altında planlı ölüm tələləri quran təhlükəli bir kəşfiyyat strukturuna” bənzədib və bu təşkilatın dərhal fəaliyyətinin dayandırılmasını, müstəqil beynəlxalq araşdırma aparılmasını tələb edib.