İşğalçı İsrail ordusu ötən gecə Ərihə şəhərində bir fələstinli gənci güllələyərək həbs edib. İsrail ordusu hadisəni “avtomobil ilə hücum cəhdi” kimi təqdim etsə də, təfərrüatlar barədə müstəqil təsdiq yoxdur.
Eyni zamanda, İordan çayının qərb sahilində İsrail ordusunun və məskunlaşmış yəhudi dəstələrinin genişmiqyaslı basqın və zorakılıqları davam edir. Cənində yerləşən Kufər Dan qəsəbəsi, Ramallah yaxınlığındakı Bərqə kəndi, Tulkarim bölgəsindəki Sayda qəsəbəsi və Nəblusun cənubundakı Bita və Udla kəndləri də daxil olmaqla bir çox əraziyə basqınlar təşkil olunub. Bu hücumlar zamanı bir neçə fələstinli gənc həbs olunub, onların evləri dağıdılıb, avtomobilləri yandırılıb.
Xalil (Hebron) və Bet-Lahm şəhərlərində də oxşar basqınlar həyata keçirilib, hərbi yoxlama məntəqələri qurulub. Nəblus şəhərindəki Balata düşərgəsinə isə xüsusi hücum təşkil olunub, bir neçə fələstinli saxlanılıb.
Eyni zamanda, Xalilin cənubundakı Masəfər Yatta bölgəsində məskunlaşan yəhudi dəstələri fələstinli Musa Əli Nəvacəyə hücum edərək onu yaralayıb. Məqsəd, fələstinliləri qorxudaraq ərazidən çıxmağa məcbur etməkdir.
İşğal altındakı Qüdsdə isə fələstinli Mahir Səliməyə, İsrail bələdiyyəsinin təzyiqi ilə, Silvan bölgəsində yerləşən evini öz əli ilə dağıtmağa məcbur edilib. Bu, işğalçının Qüdsü yəhudiləşdirmək siyasətinin bir hissəsi kimi qiymətləndirilir.
Bütün bu basqın və zorakılıqlar işğalçının fələstinliləri sıxışdırmaq, torpaqlarını əlindən almaq və məcburi köçkünlüyə məruz qoymaq məqsədi daşıyan sistematik siyasətinin tərkib hissəsidir. Fələstinlilər isə bu təcavüzkarlığa qarşı mövcud imkanları ilə müqavimət göstərməyə çağırırlar.