İsrail dünən Suriyanın cənubundakı Süveyda vilayətinə hava zərbələri endirib, nəticədə Suriya Müdafiə Nazirliyinin 6 əsgəri məhv olub, bir neçəsi yaralanıb. Hədəf alınan ərazilər Suriya ordusunun yerli silahlı qruplar və qəbilə qüvvələri arasında baş verən qarşıdurmalara müdaxilə etdiyi bölgələr idi. İsrail təyyarələri bölgədə hərbi mövqeləri vurmaqla yanaşı, istilik bombaları da atıb və hadisəni “druzlulara qarşı hücuma cavab” kimi əsaslandırıb.
Eyni zamanda, Süveydada daxili vəziyyət də gərginləşib – hökumət orqanları toqquşmalara cavab olaraq şəhərə qoşun və texnika yeridib. Suriya ordusu Druzların yaşadığı ərazilərə nəzarəti ələ keçirmək üçün hərəkətə keçib və şəhərdə komendant saatı tətbiq olunub. Daxili işlər nazirliyi bölgədəki dini və yerli liderlərə sabitliyi bərpa etmək üçün dövlətlə əməkdaşlığa çağırış edib.
Digər tərəfdən, İsrailin müdaxiləsi beynəlxalq narahatlıq doğurub. BMT-nin Suriya üzrə xüsusi nümayəndəsi Geir Pedersen vəziyyəti “təhlükəli eskalasiya” adlandırıb. Druz dini liderliyi isə hökumət qüvvələrinin bölgəyə daxil olmasına qarşı çıxıb və beynəlxalq müdafiə çağırışları edib. Bu gərginlik, İsrailin guya “druzluları qorumaq” bəhanəsi ilə regionda yeni bir cəbhə açmaq istəyi fonunda, Suriyada daha böyük toqquşmaların baş verə biləcəyinə işarədir.