Hizbullahın “Rizvan Qüvvələri”nin imkanlarını bərpa etməsinin qarşısını almaq məqsədilə təşkil edildiyi bildirilən hücumlar nəticəsində altı nəfər yaralanıb
15 iyul tarixində İsrail hava qüvvələri Livanın şərqində yerləşən Bikaa bölgəsinə hava hücumları həyata keçirib. Hücumlar nəticəsində bir neçə nəfər yaralanıb. İsrail tərəfi hücumların Hizbullahın obyektlərinə yönəldiyini bəyan edib.
“Livanın Bikaa vadisində düşmən İsrailin həyata keçirdiyi hava hücumları nəticəsində ilkin məlumatlara görə altı nəfər yaralanıb,” – deyə Livan Səhiyyə Nazirliyi açıqlama verib.
İsrail qırıcılarının 15 iyul günü günorta saatlarında Baalbekin cənub-şərqində yerləşən dağlıq əraziləri bombaladığı bildirilib.
Qısa müddət əvvəl isə Şməstar qəsəbəsinin ətrafı və Baalbekin qərbində yerləşən Umm Əli dərəsi də İsrailin hava zərbələrinə məruz qalıb.
İsrailə məxsus döyüş təyyarələri və pilotsuz uçuş aparatları Livanın bir sıra bölgələri, o cümlədən ölkənin şimal-qərbində yerləşən Cəbeyl bölgəsi üzərində aşağı hündürlükdə uçuşlarını davam etdirir.
İsrail ordusu verdiyi açıqlamada “Bikaa bölgəsindəki ‘Rizvan Qüvvələri’ hədəflərinə hücum edirik,” – deyə bildirib.
Ordu iddia edib ki, Hizbullahın elit sayılan Rizvan Qüvvələri “öz imkanlarını bərpa etməyə çalışır.”
“Zərbə endirilən hərbi düşərgələr Hizbullah terror təşkilatı tərəfindən İsrailə və IDF qüvvələrinə qarşı hücumlar planlaşdırmaq və həyata keçirmək üçün terrorçuların təlim və hazırlıq keçməsi məqsədilə istifadə olunur. Bu təlimlərdə müxtəlif silah növlərinin istifadəsi üzrə məşğələlər də yer alır,” – deyə İsrail ordusu əlavə edib.
İsrailin bu yeni atəşkəs pozuntuları ABŞ-ın Livana Hizbullahı tərksilah etməsi üçün artan təzyiqləri fonunda baş verir.
Bununla yanaşı, son dövrlərdə Dəməşqlə əlaqəli Suriyalı ekstremist qrupların Suriya–Livan sərhədi və xüsusilə keçmişdə sızmaların baş verdiyi Bikaa bölgəsi vasitəsilə Livana daxil ola biləcəyi ehtimalı ilə bağlı narahatlıq artır.
ABŞ-ın bölgə üzrə elçisi Tom Barrack keçən həftə xəbərdarlıq edərək bildirib ki, əgər Livan tezliklə müqaviməti tərksilah etməsə, ölkə yenidən “Bəlad əş-Şam”a çevrilə bilər. “Suriyalılar deyirlər ki, Livan bizim çimərlik kurortumuzdur,” – deyə Barrack bildirib. Bu sözlər Vaşinqtonun birbaşa hədəsi kimi qəbul olunub.
Livan müqavimət hərəkatı dəfələrlə silahlarını təhvil verməkdən imtina etdiyini bəyan edib. Hizbullah bildirir ki, İsrailin hücumları və işğalı davam etdiyi müddətdə bu məsələnin müzakirəsi mümkün deyil. Ancaq qrup öz silahlarının dövlət çərçivəsində inteqrasiya ediləcəyi müdafiə strategiyası barədə daxili müzakirələrə açıq olduğunu da vurğulayıb.
6 iyul tarixində İsrailin müdafiə naziri İsrail Katz Hizbullahın baş katibi Naim Qasimi silahların təhvil verilməsini rədd etdiyi üçün hədələyib.
“Hizbullah liderinin sözləri onun nə Nasrallahdan, nə də onun varisindən dərs çıxarmadığını göstərir,” – deyə Katz ötən il Beyrutda qrup rəhbərliyinin suiqəstlə öldürülməsinə işarə edərək bildirib.