Druzi dini rəhbərliyi Suriya hökumətini azlıq təşkil edən icmaya qarşı hücumlarda ekstremist qrupları dəstəkləməkdə ittiham edib
İsrail ordusu 14 iyul tarixində Suriya cənubundakı Suveyda vilayətini bombalayıb. Hücum, Dəməşqə bağlı ekstremist qruplarla druzi silahlı fraksiyaları arasında davam edən şiddətli toqquşmalarla eyni vaxtda baş verib.
İsrail ordusunun verdiyi rəsmi açıqlamada bildirilib ki, “bir qədər əvvəl Suriya cənubunda yerləşən Sami kəndində bir neçə tank vurulub”. Qurum əlavə edib ki, hücumla bağlı daha ətraflı məlumat veriləcək.
İsrailin Channel 12 telekanalı isə bildirib ki, “Suriyaya məxsus tanklar İsrailin müəyyən etdiyi sərhədi keçib və buna görə İsrail hərbi hava qüvvələri onları hədəfə alaraq zərbə endirib”.
Hücum, Suveydada hökumətyönlü tayfa döyüşçüləri və ekstremist milislərlə druzi silahlı qruplar arasında qarşıdurmaların davam etdiyi bir vaxtda baş verib.
Döyüşlər bazar günü, bədəvi döyüşçülərin Dəməşq–Suveyda avtomobil yolunda nəzarət məntəqəsi quraraq bir druzi gənci qarət edib və onu vəhşicəsinə döyməsindən sonra başlayıb. Bu hadisə cavab hücumlarına səbəb olub.
Suriya Müdafiə Nazirliyi 14 iyulda bildirib ki, döyüşləri dayandırmaq və sabitliyi bərpa etmək məqsədilə hökumət qüvvələri Suveyda vilayətinə daxil olub. Lakin dövlət qüvvələri tayfa milisləri və digər silahlı qruplarla birlikdə druzi fraksiyalarına qarşı döyüşlərdə iştirak etməkdə ittiham olunur.
Bazar ertəsi axşamı, Suriya ordusu Suveydanın qərb kəndlərini artilleriya atəşinə tutub.
Suriya Daxili İşlər Nazirliyinin sözçüsü Nureddin əl-Baba bildirib:
“Suveyda xalqının çağırış və müraciətlərinə cavab olaraq və vilayətdəki nüfuzlu tərəflərlə koordinasiya əsasında, Müdafiə və Daxili İşlər nazirlikləri qanunların tətbiqini və dövlət hakimiyyətini bərpa etmək, silahlı qanunsuz qrupları tərksilah etmək məqsədilə təhlükəsizlik yerləşdirmə planı hazırlayıb.”
O əlavə edib:
“Hadisələrin gedişi Suriya dövlətinin xeyrinə həlledici nəticəyə doğru gedir və bu, prezidentlik administrasiyasının müəyyən etdiyi baxış çərçivəsində həyata keçirilir.”
“Suveydada yerləşdirmə planı artıq tətbiq olunub və bu, oradakı aktiv qüvvələrlə aparılan müsbət əlaqə əsasında reallaşıb,” – deyə əlavə edib.
Əl-Baba qeyd edib ki, “qanunsuz silahlı qruplar Suveydadakı vətəndaş hərəkatını öz nəzarətləri altına almağa çalışırlar.”
Suriya İnsan Hüquqları Müşahidə Təşkilatının (SOHR) məlumatına əsasən, şiddətli toqquşmalarda indiyə qədər 89 nəfər həlak olub. Onların arasında dövlət təhlükəsizlik qüvvələrinin əməkdaşları, müttəfiq döyüşçülər, druzi fraksiyalarının üzvləri və mülki şəxslər – o cümlədən uşaqlar var. Təxminən 200 nəfər yaralanıb.
Suriya Müdafiə Nazirliyi 6 suriyalı əsgərin öldüyünü təsdiqləyib.
Baş verən zorakılıqlara cavab olaraq, Suriyadakı druzi icmasının dini lideri Hikmət əl-Hicri beynəlxalq ictimaiyyətə müraciət edərək druzi icmasının beynəlxalq müdafiə altına alınmasını tələb edib.
Əl-Hicri, Suriya təhlükəsizlik qüvvələrinin Suveyda bölgəsinə daxil olmasını pisləyib və onların “xalqı qorumaq bəhanəsi ilə” bölgəyə daxil olduqlarını, lakin əvəzində kəndləri bombaladıqlarını və son toqquşmalarda “təfkiri dəstələrə” ağır silahlar və pilotsuz uçuş aparatları ilə dəstək verdiklərini bildirib.
İsrail daha əvvəl druzi azlığını dəstəkləmək və onların Dəməşq tərəfindən təqib olunmasının qarşısını almaq istədiyini bəyan etmişdi. Qeyd edək ki, İsrail və Suriya hökumətləri son vaxtlar mümkün normallaşma və təhlükəsizlik razılaşmaları barədə danışıqlar aparırlar.
İsrail, bu ilin aprel ayının sonunda druzi fraksiyaları ilə Suriya hökumətinə bağlı qüvvələr arasında baş verən qarşıdurmalar zamanı Dəməşqlə əlaqəli döyüşçüləri hədəf alaraq hava zərbələri endirmişdi.
İsrail işğal qüvvələri Bəşər əl-Əsəd rejiminin süqutundan sonra Suriya cənubundakı nəzarətini möhkəmləndirib və bölgənin tam hərbsizləşdirilməsinə çalışır.
Əlaqədar xəbərlər
