BMT-nin işğal olunmuş Fələstində insan haqları üzrə xüsusi məruzəçisi Franşeska Albanese bildirib ki, İsrail işğalçı rejimi müasir tarixdə ən amansız soyqırımlardan birinə məsuldur.
Albanese İnsan Haqları Şurasında Qəzzadakı vəziyyətlə bağlı çıxışında deyib ki, Qəzza zolağındakı vəziyyət artıq fəlakət həddini keçib.
O, məruzəsində “İsrail”in ən dəhşətli soyqırımlara cavabdeh olduğunu vurğulayıb və Qəzzadakı humanitar qurumların əslində ölüm tələsi olduğunu, burada sakinlərin qəsdən öldürülüb didərgin salındığını bildirib.
Albanese BMT-ni İsrailə silah ixracına tam embarqo qoymağa, ticarət sazişlərini və investisiya əlaqələrini dayandırmağa çağırıb.
Amnesty International da bəyan edib ki, İsrail Qəzzada fələstinli mülki şəxsləri aclıqla mühasirədə saxlamaqla bunu müharibə silahına çevirib. Təşkilat dövlətləri dərhal mühasirəni qaldırmağa və soyqırımı dayandırmağa təzyiq göstərməyə çağırıb.
Amnesty həmçinin İsrailə hərbi dəstəyin kəsilməsinin, rəsmilərinə sanksiya qoyulmasının və Beynəlxalq Cinayət Məhkəməsi ilə əməkdaşlığın zəruriliyini vurğulayıb.
Albanese daha əvvəl 60-dan çox beynəlxalq şirkəti Qəzza zolağında soyqırımı dəstəkləməkdə, işğalçı orduya silah və avadanlıq satmaqda, eləcə də Qəzza və İordan çayının qərb sahilindəki hücumlar üçün nəzarət alətləri təqdim etməkdə ittiham etmişdi.
O, İsrailin müharibəsini “soyqırımı kampaniyası” adlandırıb və əsas səbəbin “maddi qazanc” olduğunu bildirib, çünki prosesdən birbaşa maliyyə mənfəəti əldə edən şirkətlər mövcuddur.
Albanese silah və texnologiya sahəsində “Lockheed Martin”, “Leonardo”, “Caterpillar”, “HD Hyundai” və həmçinin nəhəng texnologiya şirkətləri “Google”, “Amazon”, “Microsoft” kimi qurumların adını çəkərək siyahı təqdim edib.
Onun təqdim etdiyi hesabatda bu şirkətlərin İsrailin aparteid (irqi ayrı-seçkiliyin ən kəskin forması) və hərbiləşmə sistemi ilə maliyyə əlaqələrinin olduğu göstərilib və məlumatların 200-dən çox dövlət, hüquq müdafiəçisi, alim və bəzən elə şirkətlərin özlərindən daxil olan məlumatlara əsaslandığı qeyd edilib.
Albanese işğalçı rejimlə əməkdaşlığın dayandırılmasına çağıraraq, bu şirkətlərin baş direktorlarının beynəlxalq humanitar hüququ pozmaqda ittiham edilərək beynəlxalq ədalət qarşısında cavab verməli olduqlarını vurğulayıb və bildirib ki, qanlı hücumların davam etməsinin əsas səbəbi bunun geniş ticari maraqlar şəbəkəsi üçün çox sərfəli olmasıdır.
İşğalçı rejim və ABŞ hesabatın məzmununu rədd edərək onu “həqiqətlərin təhrif edilməsi” və “məruzəçinin səlahiyyətlərini aşması” kimi qiymətləndirib. İsrailin Cenevrədəki nümayəndəliyi hesabatın tövsiyələrinə məhəl qoyulmamasını tələb edib, ABŞ-ın BMT-dəki nümayəndəliyi isə baş katibdən Albanesenin tənqid olunmasını və vəzifədən kənarlaşdırılmasını istəyib.
Əlaqədar xəbərlər
