“İndependent” qəzeti “Qəzza: Hücum Altında Həkimlər” adlı sənədli film haqqında reportajında bu filmin Qəzzada həkimlərin əzabını və İsrail ordusunun qanun pozuntularını sənədləşdirmə vasitəsindən BBC daxilində mediaböhranın mənbəyinə çevrildiyini yazıb.
Qəzetin məlumatına görə, BBC-nin sifarişi və maliyyəsi ilə “Basement Films” şirkəti tərəfindən istehsal olunan film bombardman altında çalışan, kəskin təchizat çatışmazlığı və acınacaqlı səhiyyə şəraitində fəaliyyət göstərən fələstinli həkim, tibb bacısı və təcili yardım işçilərinin dəhşətli şahidliklərini təqdim edir.
Jurnalist Reyçel Klounun yazdığı reportajda qeyd olunur ki, BBC əvvəlcə filmi “cəsarətli və ictimai maraqlar üçün vacib” hesab edib, lakin sonra görüntü və məzmunun yoxlanılması bəhanəsi ilə onu nümayiş etdirməkdən geri çəkilməyə başlayıb.
Reporta görə, yanvar və fevral aylarında filmin yayımı üçün 6 fərqli tarix müəyyən edilsə də, hamısı heç bir aydın izahat verilmədən ləğv olunub. Sonda BBC 20 iyun tarixində yaydığı bəyanatla filmin nümayişini rəsmi olaraq ləğv etdiyini açıqlayıb.
Aylarla təxirəsalınmalar və filmin prodüserləri ilə gərgin danışıqlardan, həmçinin “İsrailə qarşı fələstin narrativinə tərəfkeşlik” narahatlığından sonra film Britaniya televiziyasında tamamilə yayımlanmaya bilərdi. Ancaq BBC-nin bəyanatından bir həftə sonra Britaniyanın Channel 4 kanalı bu sənədli filmi qəbul edib və film dünən, çərşənbə günü axşam nümayiş olunub.
Təxirə salma və siyasiləşdirmə
Hesabatda qeyd olunub ki, bu ilin əvvəlində gərginliklərin başladığı dövrdə BBC filmin nümayişini təxirə salmaq üçün “əsassız bəhanələr” gətirib, bu barədə prodüser komandaya yaxın mənbə bildirib.
Komanda BBC-nin Qəzza haqqında əvvəlki filmə dair Böyük Britaniyanın müstəqil yayım tənzimləyicisi Ofcom-un hesabatını gözlədiyindən şübhələnib. BBC isə əvvəlcə bunu qəti şəkildə inkar etsə də, filmi ləğv etdiyini açıqladığı son bəyanatında bu məlumatı təsdiqləyib.
Qeyd edilib ki, sözügedən digər film – “Qəzza: Müharibə zonasından necə sağ çıxmalı?” – BBC tərəfindən yayımlanmış və orada hadisələri danışan fələstinli uşağın HƏMAS liderlərindən birinin oğlu olması ilə bağlı şikayətlərdən sonra yayımı dayandırılmışdı.
“Mənbəyə istinadən İndependent” bildirib ki, mart və aprel ayları ərzində gərginlik daha da artıb, BBC məzmunla bağlı əlavə yoxlamalar tələb etməyə başlayıb və apreldə filmi tammetrajlı sənədli film kimi yayımlamaqdan imtina edərək onu hissələrə bölməyi təklif edib ki, bu da prodüser komanda tərəfindən rədd olunub.
Hesabata görə, apreldən iyuna qədər BBC və istehsalçı şirkət arasında gərgin hüquqi danışıqlar davam edib, sonda film tamamilə ləğv olunub və onu Channel 4 yayımlamağa qərar verib.
Hesabatda göstərilir ki, BBC-nin qərarı filmin prodüserləri və işdə iştirak edən jurnalistlərin, xüsusən də jurnalist və prodüser Ramita Navayının İsraili “müharibə cinayətləri və etnik təmizləmə törədən qanunsuz dövlət” adlandıraraq verdiyi açıq bəyanatlardan sonra gəlib.
Navayi BBC Radio 4-ün “Today” proqramında şahidlərin qorunması ilə bağlı mənəvi təzyiqlərdən danışıb və fələstinli həkimlərin və israilli mənbələrin ifadələrinə əsaslanaraq Qəzzada tibbi heyətlərin hədəfə alınmasının “sistematik və məqsədli siyasət” olduğunu vurğulayıb.
Ramita Navayi bəyanatında bildirib ki, layihə komandası bir ildən çox müddətdə insan haqları təşkilatları və səhiyyə işçiləri ilə işləyərək “İsrailin müharibə cinayətləri ilə bağlı dəqiq sübutlar topladı”.
Hesabatda qeyd olunub ki, Channel 4 isə bəyanatında medianın vəzifəsinin həqiqəti üzə çıxarmaq olduğunu bildirib, “hətta bəziləri onun kölgədə qalmasını istəsə belə”, xüsusən film Qəzzada planlı dağıntı və əhalinin tibbi hüquqlardan məhrum edilməsini nadir humanitar şahidliklə sənədləşdirir.