Səhiyyə işçiləri aclıq, dərman çatışmazlığı və dağılmış xəstəxana infrastrukturunu əsas problemlər kimi göstərirlər.
Sərhədsiz Həkimlər Təşkilatının (MSF) 5 iyun tarixli açıqlamasına görə, Qəzzada həkimlər İsrail qüvvələrinin bu həftənin əvvəlində ərzaq axtaran insanlara atəş açmasından sonra xəstələri müalicə etmək üçün öz qanlarını verməyə başlayıblar.
3 iyun tarixində sionist rejimin hərbi qüvvələri Rəfahda Qəzza Humanitar Fondu (GHF) tərəfindən yaradılmış ərzaq paylama nöqtəsi yaxınlığında azı 27 aclıqdan əziyyət çəkən fələstinlini qətlə yetirib. İki gün əvvəl isə GHF-nin digər yardım məntəqəsinin yaxınlığında daha bir hücum zamanı azı 31 nəfər öldürülüb, 170-dən çox insan yaralanıb.
Bu ardıcıl hadisələr Qəzzada onsuz da çökmək üzrə olan səhiyyə sistemini tam iflic vəziyyətinə gətirib. Tibbi ləvazimatların tükənməsi və xəstəxanaların aşırı yüklənməsi fonunda, həkimlər xəstələri yaşatmaq üçün öz qanlarını verməyə məcbur olublar.
Təxminən 100 nəfərdən ibarət MSF heyəti Cenevrədə BMT-nin baş qərargahı qarşısında aksiya keçirərək, sionist rejimin dəstəklədiyi yardım sistemi nəticəsində Qəzzada yaranmış xaosu və mülki ölümləri pisləyiblər.
MSF direktoru Stiven Korniş bildirib ki, ciddi aclıq fələstinliləri qan vermək iqtidarından salıb və buna görə də tibbi personal birbaşa müdaxilə etməyə məcbur qalıb.
Qəzzanın Səhiyyə Nazirliyinin məlumatına görə, təkcə GHF-nin fəaliyyət göstərdiyi ilk səkkiz gün ərzində yardım nöqtələri yaxınlığında azı 102 fələstinli öldürülüb, təxminən 500 nəfər yaralanıb.
Hadisə şahidlərinin sözlərinə görə, İsrail əsgərləri silahsız mülki şəxslərə atəş açıblar. İsrail ordusu isə bəyan edib ki, onlar guya HƏMAS üzvlərini hədəf alıblar və “şübhəli şəxslərə” atəş açdıqlarını etiraf ediblər.
2025-ci ilin iyun ayına olan məlumata əsasən, Qəzzada səhiyyə sistemi çökmək üzrədir. Ümumdünya Səhiyyə Təşkilatının (ÜST) hesabatına görə, ərazidəki 36 xəstəxanadan yalnız 19-u fəaliyyət göstərir və onlardan yalnız 12-si ilkin təcili tibbi xidmətdən artıq xidmət göstərə bilir.
Etnik təmizləmə kampaniyası zamanı xəstəxanaların azı 94 faizi zədələnib və ya məhv edilib.
ABŞ-sionist soyqırımı başladıqdan bəri ÜST Qəzzada səhiyyə obyektlərinə qarşı 654 hücum qeydə alıb.
Beynəlxalq ictimaiyyət təcili addımlar atılmasını, mülki əhalinin qorunmasını və humanitar hüququn təmin olunmasını tələb edir.
Əlaqədar xəbərlər
