Qəzzənin tibbi infrastrukturu bir-birinin ardınca sıradan çıxır və indi fəaliyyətsiz müəssisələrin uzun siyahısına daha bir müəssisə əlavə edilib.
Xarici KİV-in verdiyi məlumata görə, Qəzzə zolağının şimalında yerləşən böyrək xəstələrinə aid Noura əl-Kəbi xəstəxanası bazar günü axşam saatlarında İsrail ordusu tərəfindən hədəfə alınıb və tamamilə xidmətini dayandırıb.
Bu tibb mərkəzi Qəzzənin şimalında yeganə ixtisaslaşmış dializ xəstəxanası idi və Beyt Lahiya, Beyt Hanun, Cəbaliya və Umm ən-Nəsr kəndi kimi bölgələrdə yaşayan xəstələrə xidmət göstərirdi.
Əvvəllər bu xəstəxananın hissələri əvvəlki hücumlar zamanı zədələnmişdi və aktiv dializ aparatlarının sayı 8-ə endirilmişdi.
Xəstəxananın fəaliyyətinin tamamilə dayandırılması bu ərazilərdə böyrək xəstələrinin həyati vacib tibbi xidmətlər əldə etməsini ciddi şəkildə məhdudlaşdırıb.
Qəzzə Səhiyyə Nazirliyi müharibənin başlanmasından bəri böyrək çatışmazlığı olan xəstələrin 41%-nin müvafiq tibb müəssisələrinə çıxışın olmaması səbəbindən dünyasını dəyişdiyini açıqlayıb. Nazirlikdən verilən məlumata görə, bu tendensiyanın davam etməsi xəstələrin həyatı üçün daha ciddi risklər yarada bilər.
2023-cü ilin Oktyabr ayında münaqişə başlayan vaxtdan Qəzzə zolağında səhiyyə infrastrukturuna böyük ziyan dəyib. Rəsmi məlumatlara görə, ərazidəki 32 xəstəxana və 150-dən çox tibb məntəqəsi xidmət sıralarından çıxıb.
