Qəzzədə humanitar faciə öz zirvəsinə çatıb. İşğalçı ordu son cinayətində özü tərəfindən təqdim edilmiş ərzaq yardımı paylama mərkəzlərini hədəfə alıb.
Xarici KİV-in verdiyi məlumata görə, cümə axşamı günü (29 May) media mənbələri Qəzzə zolağının mərkəzində, Netzarim dəhlizi yaxınlığındakı yardım paylama mərkəzinin yaxınlığında güclü bir partlayışın baş verdiyini bildiriblər.
Daha sonra fələstinli media qurumları həmin nöqtənin bombalandığını xəbər veriblər, lakin hücum nəticəsində mümkün qurbanların sayı hələ dəqiq bilinmir.
Bu xəbərin yayımlanmasından əvvəl Qəzzədəki Fələstin Səhiyyə Nazirliyi bildirib ki, son cəmi 48 saat ərzində, Rəfəhda amerikalı bir şirkət tərəfindən idarə olunan yardım paylama mərkəzlərinin yaxınlığında İsrail ordusunun atəşi nəticəsində 9 nəfər şəhid olub, 60-dan çox insan yaralanıb.
Bəzi sosial media istifadəçiləri isə bu cinayətdə yaralanan şəxslərdən birinin görüntüsünü paylaşaraq onun necə müalicə yerinə daşındığını göstəriblər və yazıblar: “İşğalçıların atəşi nəticəsində yaralanan bir şəxs bu şəkildə aparılır. O, Rəfəh və Xan Yunis arasında yerləşən ABŞ yardım mərkəzinə çatmağa çalışırdı. Bu yerlər yardım paylama mərkəzi deyil, fələstinli gənclərin qətlə yetirilməsi və aradan qaldırılması üçün nöqtələrdir.”
Qəzzə Dövlət İnformasiya İdarəsi cümə axşamı günü bildirib ki, İsrail ordusu son iki gün ərzində Rəfəhda “yardım paylama mərkəzləri” adlandırılan ərazilərdə azı 10 aclıqdan əziyyət çəkən mülki şəxsi şəhid edib, 62 nəfəri isə yaralayıb.
Məlumatlı mənbələr bildiriblər ki, işğalçı qüvvələr Rəfəh şəhərinin əl-Məvasi bölgəsində yerləşən əl-Ələm döngəsində fələstinlilərə atəş açıblar. Bundan əlavə, İsrailin Rəfəhin şimalındakı Morag bölgəsinə həyata keçirdiyi hava hücumu nəticəsində bir fələstinli şəhid olub.
Qəzzə Dövlət İnformasiya İdarəsi aclıq içində yardımlar üçün Rəfəhda toplaşan mülki şəxslərin qətli ilə bağlı tam məsuliyyəti İsrail ordusunun və onunla əməkdaşlıq edən Amerika qurumunun daşıdığını bəyan edib.
ABŞ və İsrailin dəstəklədiyi, Qəzzədə fəaliyyət göstərən və “Qəzzə Humanitar Fondu” (GHF) adı ilə tanınan fondun ərzaq paylaması – gözlənildiyi kimi – sadəcə ictimai rəyi aldatmaq məqsədilə həyata keçirilməyə başlanıb. Fələstin tərəfinin əvvəlcədən verdiyi xəbərdarlıqlara uyğun olaraq, ərzaq paylanması üçün elan edilən mərkəzlər aclıq içindəki fələstinli qaçqınlar üçün “öldürücü tələyə” çevrilib.