BMT-yə bağlı UNRWA yardım agentliyi sionist rejim ordusunun Qəzzə zolağına qarşı 18 aydan çox davam edən müharibəsi nəticəsində bu bölgədəki evlərin 92 faizinin dağıdıldığını və ya zədələndiyini bildirib.
Xarici KİV-in verdiyi məlumata görə, BMT-nin Fələstinli Qaçqınlara Yardım və İş Agentliyi (UNRWA) bildirib ki, 7 Oktyabr 2023-cü il tarixindən bəri İsrail rejiminin Qəzzəyə qarşı apardığı fasiləsiz müharibə nəticəsində Qəzzə zolağındakı evlərin 92 faizi ya dağıdılıb, ya da zədələnib.
UNRWA “X” (əvvəlki Twitter) sosial şəbəkəsində bu statistikanın Qlobal Mühafizə Qrupunun məlumatlarına əsaslandığını yazıb. Bu qrup qeyri-hökumət təşkilatları, beynəlxalq qurumlar və BMT agentliklərindən ibarətdir və münaqişə, təbii fəlakət və digər humanitar böhranlar zamanı insanları qorumaq üçün fəaliyyət göstərir.
Agentlik vurğulayıb ki, Qəzzə zolağında yaşayan ailələr təsəvvürəgəlməz dağıntılarla üz-üzədirlər.
İsrailin müharibə maşınının davamlı təcavüzü və genişmiqyaslı dağıntılar fonunda UNRWA bildirib ki, çoxsaylı insanlar dəfələrlə köçkün düşüb, halbuki onları qəbul edə biləcək sığınacaqlar son dərəcə məhduddur.
UNRWA Qəzzənin mühasirəsinin aradan qaldırılmasının zəruriliyini vurğulayaraq bildirib ki, çətin şəraitə baxmayaraq həyati əhəmiyyətli yardımları göstərməkdə davam edir.
Sionist rejim təxminən iki ay yarımdır ki, Qəzzə zolağını ciddi mühasirəyə alıb və burada yaşayan iki milyondan çox fələstinliyə ərzaq və dərman yardımlarının daxil olmasına mane olur.