Xəbər mənbələri Qəzzə zolağının cənubundakı fələstinlilərə aid qaçqın çadırlarının bombalanması nəticəsində 5 nəfərin şəhid olduğu haqda məlumat veriblər.
Xarici KİV-in Cümə günü verdiyi məlumata görə, sionist rejimin Xan Yunisin qərbinə etdiyi hava hücumunda Əbu Taimə ailəsinin 5 üzvü – ata, ana və onların 3 övladı – şəhid olub.
Fələstinli qaçqınların çadırlarına olunan bu hücumda bir sıra insan da yaralanıb.
Fələstin Səhiyyə Nazirliyinin ən son hesabatına əsasən, ötən Mart ayının 18-dən, yəni sionist rejimin atəşkəsi pozaraq öz hücumlarına başladığı vaxtdan bəri Qəzzə zolağında 1978 fələstinli şəhid olub və 5207 nəfər isə yaralanıb.
Qəzzədəki Fələstin Səhiyyə Nazirliyi 2023-cü ilin Oktyabr ayının 7-dən etibarən işğalçı İsrail rejiminin törətdiyi soyqırım müharibəsində indiyə qədər həyatını itirənlərin sayının 51355 nəfər, yaralananların sayının isə 117248 nəfər olduğunu açıqlayıb.
Sionist rejimi ABŞ-ın dəstəyi ilə 7 Oktyabr 2023-cü il tarixindən 19 Yanvar 2025-ci ilədək Qəzzə zolağında dinc əhaliyə qarşı dağıdıcı bir müharibəyə başladı. Bu müharibə geniş dağıntılara və çoxsaylı insan tələfatına səbəb oldu, lakin rejim elan etdiyi hədəflərə – İslam Müqavimət Hərəkatı “HƏMAS”ın məhv edilməsinə və sionist əsirlərin azad olunmasına – çata bilmədi.
2025-ci il Yanvarın 19-da HƏMAS və sionist rejim arasında əldə edilən razılaşmaya əsasən, Qəzzə zolağında atəşkəs elan olundu. Lakin bu rejimin ordusu 2025-ci il Martın 18-də atəşkəsin şərtlərini pozaraq Qəzzəyə qarşı hərbi təcavüzünü yenidən başladı.