Qəzzə Hökumətinin Media Ofisi hesabatlarının birində bəzi tibbi əşyaların artıq Qəzzədə olmadığını, digər tərəfdən də işğalçı ordunun qəsdən Qəzzə xalqını “aclıqdan öldürmək” siyasətini mənimsədiyini bildirib.
Qəzzə zolağının keçidlərinin hələ də bağlı olduğu və ərzaq yardımının gəlməsi dayandırıldığı bir vaxtda bu bölgə xalqının sağ qalmaq üçün çox az miqdarda konserv məhsulları, çörək var. Sionist rejimi bir neçə xeyriyyə mətbəxini də hədəfə alıb.
Qəzzə zolağında fələstinli ailələr üçün gündəlik yemək hazırlamaq çətin və yorucu bir işə çevrilib. Sionist işğalçılar 30 gündən artıqdır ki, sərhəd-keçid məntəqələrini bağlayıb, ərzaq və humanitar yardımların ölkəyə girişinin qarşısını alıblar. Bazarda qalan bir neçə malın qiyməti də kəskin şəkildə artaraq Qəzzə əhalisinin əziyyətini ikiqat artırıb.
İşğalçı rejim Martın 2-dən etibarən Qəzzə zolağında mühasirəni tamamilə gücləndirərək, həyat üçün zəruri olan bütün məhsulların, xüsusən də tərəvəz, ət, meyvə və digər malların ölkəyə daxil olmasına mane olub. Bu, bazarlarda malların, hətta konservlərin kəskin qıtlığına səbəb olub.
Çörəkxanaların un tükənməsi səbəbindən bağlanması, yemək bişirmək üçün odun qiymətinin artması və 18 aylıq müharibə zamanı minlərlə fələstinli ailəyə sığınacaq verən xeyriyyə mətbəxlərinin az qala dağıdılması ilə vəziyyət günü-gündən kritikləşir.
Qəzzə Hökumətinin Media Ofisinin məlumatına görə, işğalçılar bilərəkdən “kütləvi aclıq” siyasətini həyata keçirirlər. Soyqırım müharibəsi başlayandan bəri onlar bütün keçidləri bağlayıblar və bir aydan çoxdur ki, humanitar yardımların ölkəyə girişini tamamilə əngəlləyiblər. Bu müddət ərzində 18 min 600 yardım maşını və 1550 yanacaq daşıyan maşının ölkəyə girişi qadağan edilib. İsrail ordusu həmçinin 60-dan çox xeyriyyə mətbəxi və yardım paylama mərkəzini bombalayıb və sıradan çıxarıb.
Adıçəkilən təşkilat, həmçinin qəsdən çörək bişirənləri hədəf aldığını və onlarla çörək sexinin fəaliyyətini dayandırdığını vurğulayıb; Bu, humanitar böhranı daha da dərinləşdirib və insanlar arasında aclığı daha qabarıq göstərib.
Dərman çatışmazlığı minlərlə xəstənin həyatını təhdid edir
Eyni zamanda, Fələstin Səhiyyə Nazirliyi xəbərdarlıq edib ki, bölgədə dərman və tibbi avadanlıq çatışmazlığı “misli görünməmiş və son dərəcə təhlükəli” səviyyəyə çatıb.
Qəzzə Hökumətinin Media Ofisinin məlumatına görə, bu böhran 7 Oktyabr 2023-cü ildən etibarən daha da şiddətlənib və Qəzzə zolağının səhiyyə sistemini dağılma həddinə gətirib. Bu, sionist rejimin hava və quru hücumlarının bölgənin müxtəlif hissələrini hədəf almaqda davam etdiyi bir vaxtda baş verir. Qeyd edək ki, İsrail təxminən üç həftə əvvəl Qəzzə mühasirəsində yaşayan əhaliyə qarşı yeni müharibə mərhələsinə başlayıb.
Səhiyyə Nazirliyinin statistik hesabatına əsasən, həyati əhəmiyyətli dərmanların 37 faizi, tibbi istifadəlik materialların 59 faizi və xərçənglə yanaşı, qan xəstəlikləri olan xəstələr üçün lazım olan dərmanların 54 faizi tamamilə tükənib və hazırda sıfır ehtiyatla qarşı-qarşıyadır.
Təşkilat həmçinin vurğulayıb ki, 80 min şəkərli diabet xəstəsi və 110 min yüksək təzyiqdən əziyyət çəkən insan ilkin səhiyyə ocaqlarında ehtiyac duyduqları dərmanlara malik deyil. Eyni zamanda, əməliyyat otaqları, reanimasiya şöbələri və təcili tibbi yardım şöbələri kimi həyati vacib şöbələr tamamilə tükənmiş resurslarla və həyati xilasedici dərmanlar və avadanlıqlar tükənməkdə davam edir.
Bununla əlaqədar Qəzzə Səhiyyə Nazirliyi “xəstəxanalar və ilkin səhiyyə mərkəzlərini dərman və tibbi ləvazimatlarla təmin etmək üçün təcili tədbirlər görməyə” çağırıb və xəbərdarlıq edib ki, keçidlərin bağlanması və tibbi ləvazimatların ölkəyə girişinin qarşısının alınması vəziyyəti daha da kritikləşdirib və yaralı və xəstələrə tibbi xidmət göstərməkdə fəlakətli maneələrlə üzləşib.