Fələstin mənbələri Qəzzənin şimalında yerləşən əl-Məmədani xəstəxanasının bir neçə binasının bombalanması barədə məlumat veriblər.
Fələstin mənbələri dünən (bazar günü) sübh saatlarında bildiriblər ki, sionist işğalçı rejimin qırıcı təyyarələri bir neçə raketlə əl-Məmədani xəstəxanasının ən azı üç binasını hədəfə alıblar.
Xarici KİV-in verdiyi məlumata əsasən, sionist ordusu əl-Məmədani xəstəxanasının təcili yardım, daxili xəstəliklər və aptek bölmələrini bombalayıb.
Xəstəxana binasından alov qalxdığı bildirilib.
Bu hücumdan bir neçə saat əvvəl işğalçılar xəstəxananın üzərinə vərəqələr ataraq Qəzzənin şimalında yerləşən bu yeganə tibbi mərkəzin dərhal boşaldılmasını tələb etmişdilər.
Bu xəbərdarlıqdan sonra tibb heyəti və müşayiət edən şəxslər dərhal xəstə və yaralıları xəstəxanadan çıxarmağa başlayıblar.
Bu, Qəzzə müharibəsinin başlanmasından bəri Əl-Məmədani xəstəxanasının işğalçı qüvvələr tərəfindən birbaşa hücuma məruz qaldığı neçənci hadisədir. Bu xəstəxanaya ilk və ən faciəli hücum 2023-cü ilin 17 Oktyabr axşamı baş vermişdi. Həmin hücumda xəstəxanaya sığınmış yüzlərlə dinc sakin, qadın, uşaq və xəstə şəhid olmuşdu. Bu hadisə dünyada böyük bir qəzəb dalğası yaratmışdı, lakin müharibənin üzərindən bir ildən artıq vaxt keçməsinə baxmayaraq, nə layiqli bir cavab verildi, nə də hücumlar dayandırıldı – əksinə, tibbi mərkəzlərə qarşı hücumlar davam edir.
Sionist rejimin Qəzzəyə qarşı ümumi hücumuna başladığı vaxtdan bəri 30-dan çox xəstəxana və müalicə mərkəzi tamamilə və ya qismən məhv edilib. Şifa, Nasir, İndoneziya, əl-Əqsa və Qüds xəstəxanaları birbaşa hücuma məruz qalan əsas tibbi mərkəzlər arasında olub.
İsrail ordusu dəfələrlə bu xəstəxanaların Fələstin müqavimət qüvvələrinin yerləşdiyi məkanlar olduğunu iddia edib, lakin beynəlxalq təşkilatlar və hadisə şahidləri bu iddiaları təkzib ediblər.
Xüsusilə İngiltərə Anglikan Kilsəsinin nəzarəti altında fəaliyyət göstərən əl-Məmədani xəstəxanasına edilən təkrar hücumlar, sionist rejimin Qəzzə zolağında həyati infrastruktur obyektlərini hədəfə alan siyasətinin bir hissəsi hesab olunur.
Eyni zamanda, Fələstin mənbələri Qəzzənin müxtəlif bölgələrinin şiddətli bombardman edildiyini bildiriblər. Qəzzə zolağının cənubunda yerləşən Xan Yunis şəhəri də ağır hücumlara məruz qalıb. Bu hücum zamanı baş verən cinayətdə Xan Yunisin qərb bölgəsinin polis rəisi Məhəmməd əd-Dərbaşi evinin bombalanması nəticəsində şəhid olub.
Əlaqədar xəbərlər
