İordan çayının qərb sahilindəki Beyt Ləhm əyalətinin qərbindəki Vadi Fokin qəsəbəsində ev sökülməsi əməliyyatı zamanı işğalçı İsrail qüvvələri tərəfindən ağır döyülən yaşlı fələstinli şəhid olub.
Fələstinin rəsmi xəbər agentliyi məlumatına görə, 70 yaşlı şəhid “Ğazi Bədr Munasara” İsrail əsgərlərinin dəyənək və tüfəng qundağı ilə şiddətli hücumuna məruz qaldıqdan sonra insult keçirib və bir neçə dəqiqə sonra dünyasını dəyişib.
Bu hadisədə aralarında şəhid Munasaranın da olduğu daha 6 Fələstin vətəndaşı da səthi xəsarətlər alıb.
Hadisə yerindən yayımlanan videoda israilli hərbçilərin bir qrup fələstinliyə vəhşicəsinə hücum edərək onları döydüyü görünür.
Bundan əvvəl də sionist işğalçı ordu müxtəlif bölgələrdə yerləşən yeddi fələstinli evini “qanunsuz tikinti” bəhanəsi ilə dağıtmışdı.
Bu hadisələr, israilli hərbçilərin 21 yanvar tarixindən bəri İordan çayının qərb sahilinin şimalındakı düşərgələrə, qəsəbələrə və şəhərlərə hücumlarını davam etdirdiyi bir vaxtda baş verir.
Sionist qüvvələrin bu təcavüzləri nəticəsində indiyədək 946-dan çox fələstinli şəhid olub, təxminən 7 min nəfər yaralanıb və 15 min 800-dən çox şəxs həbs edilib.
Həftənin çərşənbə axşamı başqa bir ayrı insidentdə isə 30 yaşlı fələstinli qız – “Əmanə İbrahim Məhəmməd Yaqub” – Səlfitin qərbində yerləşən Harəs qəsəbəsinin yaxınlığındakı yolayrıcında bıçaqla hücum etməyə cəhd və daş atmaq ittihamı ilə sionist ordusu tərəfindən güllələnərək şəhid edilib.