İsrail qüvvələri İordan çayının qərb sahillərinin şimalında bir sıra fələstinlilərin evini dağıtmaqla yanaşı, bu bölgədəki bir məscidi də dağıdıb.
Xarici KİV-in verdiyi məlumata görə, çərşənbə axşamı günü günorta saatlarından sonra İsrail rejimi bir buldozerlə İordan çayının qərb sahillərinin şimalında yerləşən Cenin düşərgəsi ətrafındakı “Məhyub” küçəsində olan “Həmzə” məscidini dağıdıb.
Fələstin yerli mənbələri də bildiriblər ki, israilli hərbiçilər İordan çayının qərb sahillərinin şimalında İsrail ordusunun gördüyü işlərlə bağlı reportaj hazırlayan jurnalistlərə tərəf səs bombaları atıblar.
Həmçinin verilən məlumatda İsrail qüvvələrinin bir sıra Fələstin vətəndaşını Cenin düşərgəsinin şərq girişindəki evlərini tərk etməyə məcbur etdikləri bildirilib. Sionist ordusunun bu insanların da evini dağıtmaq niyyətində olduğu qeyd olunub.
Eyni zamanda yerli mənbələr İsrail rejiminə aid buldozerlərin Cenin düşərgəsində yerləşən “əl-Həvaşin” və əl-Alub” məhəllələrində qazıntı işləri apardıqları və infrastrukturları məhv etməkdə olduqları barədə məlumat veriblər.
Digər bir məlumata görə, İsrail qüvvələri Cenin düşərgəsində bir neçə evi yandırıb.
İordan çayının qərb sahillərinin şimalında fələstinlilərə aid mənzil və məscidlərin dağıdılması bir neçə gün bundan əvvəl İsrail rejimi ordusunun hərbi əməliyyatları ilə eyni zamanda başlayıb.
İsrail ordusu və bu rejimin təhlükəsizlik qüvvələri ötən həftənin çərşənbə axşamı günündən etibarən, İordan çayının qərb sahillərinin şimalında “Dəmir divar” adlı əməliyyata başlayıblar. Onlar İordan çayının qərb sahillərindəki müqavimət qüvvələrini aradan aparmağa çalışırlar.
Bu müddət ərzində İsrail rejimin hücumlarında bir sıra Fələstin vətəndaşı şəhid olub və onlarla insan da həbs olunub.