Sionist rejimi fələstinlilərə qarşı cinayətlərinin davamında Xan Yunisin qərbinə hücum edib və nəticədə, bir neçəsi uşaq olmaqla 10 nəfər şəhid olub.
Xarici KİV-in verdiyi məlumata görə, Xan Yunisin qərbində yerləşən əl-Məvsay məntəqəsindəki fələstinli qaçqınların məskunlaşdığı çadıra olunan bu hücumlarda digər 15 nəfər də yaralanıb.
Yerli mənbələrin verdiyi məlumata əsasən, şəhid olanların 5-i qadın və uşaqdır.
Eyni zamanda Qəzzə zolağındakı Fələstin Səhiyyə Nazirliyi çərşənbə günü açıqlamasında bildirib ki, sionist rejimi ötən 24 saat ərzində Qəzzə zolağında 2 qətliam törədib. Bunun nəticəsində də 12 nəfər şəhid olub və 41 nəfər isə yaralanıb.
Bu şəhidləri nəzərə almaqla, 2023-cü ilin Oktyabr ayının 7-dən indiyə qədər (cümə axşamı) Qəzzə zolağında şəhid olanların sayı 45 553, yaralananların sayı isə 108 379 nəfərə çatıb.
Sionist rejimin Qəzzə zolağının müxtəlif bölgələrinə hücumu hələ də davam edir və bu müharibədə həyatını itirənlərin əksəriyyətini qadınlar, uşaqlar, tibb işçiləri və jurnalistlər təşkil edir.
Bütün bu cinayətlərə baxmayaraq, sionist rejimi 15 ay müharibədən sonra hələ də öz hədəflərinə, yəni HƏMAS hərəkatını məhv etməyə və sionist əsirlərini Qəzzə zolağından qaytarmağa nail ola bilmədiyini etiraf edib.
Əlaqədar xəbərlər
