UNİCEF sionist rejimin təxminən 2 ay müddətindəki vəhşi hücumlarının ardınca Livanda 200-dən çox uşağın şəhid olduğunu açıqlayıb.
Xarici KİV-in verdiyi məlumata görə, BMT-nin Uşaq Fondu (UNİCEF) bu gün verdiyi hesabatda sionist rejimin 2 ay ərzindəki davamlı təcavüzləri nəticəsində Livanda 200-dən çox uşağın şəhid olduğunu və 1100 uşağın isə yaralandığını bildirib.
UNİCEF-in sözçüsü “Ceyms Elder” deyib: Livan və Qəzzə müharibəsi arasında dəhşətli oxşarlıqlar var. Hansı ki, orada sionist rejimi və HƏMAS arasındakı 13 aylıq müharibədə öldürülən 43000 insanın əhəmiyyətli bir hissəsinin uşaqlardan ibarət olduğu bildirilir.
Bundan öncə Livan Səhiyyə Nazirliyi bildirmişdi ki, 2023-cü ilin Oktyabr ayının 8-dən ötən günə qədər sionist rejimin Livana olan hücumları zamanı 3516 nəfər şəhid olub.
Həmçinin Livan Səhiyyə Nazirliyinin bəyanatına əsasən, bu hücumlar ötən günə qədər ümumilikdə 14929 nəfərin yaralanması ilə nəticələnib.
Livan parlamentindəki Müqavimətə Sadiqlik fraksiyasının üzvü Əmin Şeri bildirmişdi: İşğalçı, Beyruta hücum etməklə insanları qorxutmağa və yeni köçkün dalğası yaratmağa çalışır. Beyruta qarşı son təcavüzlərdən sonra biz köçün şahidi olmadıq və xalq sabit qaldı. İşğalçı rejim Beyrut sakinlərinin iradəsini qıra bilməyəcək.