Qəzzə zolağındakı rəsmi mənbələr sionist işğalçılarının Qəzzə zolağının şimalına və mərkəzinə olan vəhşi hücumları nəticəsində şəhid olanların sayının artması barədə məlumat veriblər.
Qəzzə zolağındakı Dövlət İnformasiya Ofisi verdiyi bəyanatda açıqlayıb: İşğalçı sionist ordusu yaxın saatlarda Qəzzənin şimal və mərkəzində yerləşən Beyt Lahiya, ən-Nəsirat və əl-Bəricdə bir neçə qəddar cinayət və qətliam törədib.
Adı qeyd olunan təşkilat bu cinayət və qətliamda 96 fələstinlinin şəhid olduğunu, 15 nəfərdən çoxunun itkin düşdüyünü və 60 nəfərin isə yaralandığını bildirib.
Həmçinin şəhid olan 72 nəfərdən çoxunun Beyt Lahiyadakı Ğəbayin, Safi, İyadə, Əbdül Ati və ət-Təluli ailələrindən olduğu bildirilib.
Qəzzə zolağındakı Dövlət İnformasiya Ofisi vurğulayıb ki, ən-Nəsirat və əl-Bəric düşərgələrində baş verən iki qətliamın və bu bölgələrdəki fələstinlilərin evlərinin bombalanmasının ardınca, Əbu İrmanə, Seydom, Əql, əl-Misri, əl-Həmlavi və Əmum ailələrindən olan 24 fələstinli şəhid olub.
Bu ofisdən bildirilib ki, sionistlər bu yaşayış mənzilləri və binalarında əksəriyyəti qadın və uşaqlardan ibarət olan onlarla fələstinli qaçqın və mülki şəxsin yaşadığını bilirdilər.
Qəzzə zolağındakı Dövlət İnformasiya Ofisi fələstinli mülki əhalinin, xüsusən də qadın və uşaqların işğalçı sionist ordusunun hücumlarında öldürülməsini pisləyib.