İsrail ordusu BMT-nin Qəzzə zolağındakı digər bir məktəbini hədəfə alıb və bir neçə fələstinlini şəhid edib.
Qəzzə hökumətinin ictimaiyyətlə əlaqələr şöbəsi sionist ordusunun Qəzzə zolağının mərkəzində yerləşən ən-Nəsirat düşərgəsindəki “əl-Cauni” məktəbini hədəfə aldığını açıqlayıb.
Bu məlumata əsasən, bu məktəb BMT-nin Fələstinli Qaçqınlara Yardım və İşlər üzrə Agentliyinə (UNRWA) aid məktəblərdən biri olub və 5000-ə yaxın qaçqın orada məskunlaşıb.
Qəzzə hökuməti bildirib ki, bu cinayətdə azı 9 nəfər şəhid olub və BMT-nin bir neçə işçisi də daxil olmaqla, 18 nəfər yaralanıb.
Bu, sionist ordusunun ən-Nəsirat düşərgəsindəki fələstinli ailələrə qarşı 47-ci hücumudur. Bu məntəqədə təxminən 250 min fələstinli məskunlaşıb.
Qəzzə hökumətinin yaydığı məlumatdan bir neçə dəqiqə sonra xəbər şəbəkələrindən biri öz müxbirinə istinadən bildirib ki, “əl-Cauni”də şəhid olan fələstinlilərin sayı 13 nəfərə yüksəlib.
Qəzzə Mülki Müdafiə Təşkilatının sözçüsü “Mahmud Bəsəl” verdiyi müsahibədə “əl-Cauni” məktəbinin 5-ci dəfə hücuma məruz qaldığını qeyd edib. O, bu məktəbin əvvəlcədən xəbərdarlıq edilmədən və qəfildən İsrail rejiminin hədəfinə çevrildiyinə işarə edib.
“Mahmud Bəsəl” eyni zamanda bildirib ki, bəzi qaçqınlar hələ də dağıntılar altında qalıb və çıxarılmayıblar.