Xəbər mənbələri cümə günü Qəzzənin mərkəzinin bombalanması zamanı 7 fələstinlinin şəhid olması barədə məlumat veriblər.
Xarici KİV-in verdiyi məlumata görə, sionist rejimin ordusu Qəzzə zolağının mərkəzində yerləşən ən-Nəsirat düşərgəsinin qərbindəki bir evi hədəfə alıb. Bu hücumda 7 nəfər şəhid olub və bəziləri isə yaralanıb.
Sionist rejiminə aid qırıcılar, həmçinin Qəzzənin cənubunda yerləşən Rəfəh və Xan Yunisdəki və Qəzzənin şimalındakı bəzi bölgələri bombalayıblar.
Qəzzədəki Fələstin Səhiyyə Nazirliyi bundan öncə Qəzzə müharibəsində şəhid olanların sayının 40878 nəfərə yüksəldiyini açıqlamışdı.
Sionist rejimi 2023-cü ilin Oktyabr ayının 7-dən etibarən, Qəzzə zolağına qarşı dağıdıcı müharibəyə başlayıb. Bu müddət ərzində Qəzzə zolağındakı evlərin və strukturların 70%-i ciddi şəkildə ziyana uğrayıb. Misli görünməmiş aclıq və qıtlıqla yanaşı, ağır mühasirə və humanitar böhran bu bölgənin əhalisinin həyatını təhdid edir.
Bütün bu cinayətlərə rəğmən, sionist rejimi təxminən 11 aydan sonra etiraf edib ki, bu müharibədə hələ də HƏMAS-ın məhv edilməsi və sionist əsirlərinin Qəzzədən qaytarılması kimi öz hədəflərinə çata bilməyib.