Sionist rejiminə məxsus qırıcı təyyarələrin dünən səhər Qəzzənin cənubunda yerləşən Rəfəh şəhərinin müxtəlif məntəqələrinə hücumu zamanı çox sayda qadın və uşaq da daxil olmaqla, yüzlərlə Fələstin vətəndaşı şəhid olub yaxud da yaralanıb.
Xəstəxana mənbələrinin verdiyi məlumata görə, bu ana qədər (dünən səhər) 100-dən çox şəhid və 160-dan çox yaralı Rəfəh şəhərində yerləşən əl-Küveyt və Əbu Yusif ən-Nəccar xəstəxanalarına köçürülüb.
Fələstin Qırımız Aypara Cəmiyyəti sionist rejiminə aid qırıcıların Rəfəh şəhərinə geniş və davamlı hücumlarla bir neçə ev və məscidi hədəfə aldıqlarını bildirib.
Əl-Küveyt xəstəxanasının direktoru Suheyb əl-Həms deyib ki, bu xəstəxana bir çoxlarının vəziyyəti ağır olan yaralılarla doludur və bu xəstəxanada kifayət qədər dərman və xəstəxana avadanlıqları yoxdur.
Xəstəxana mənbələrinin sözlərinə görə, Əl-Küveyt xəstəxanasının ətrafında sionist rejimi ordusu və müqavimət döyüşçüləri arasında ağır toqquşma səsləri eşidilib. Yüzlərlə adi vətəndaş sionist rejiminin şəhərin şimalında yerləşən əş-Şaburəh bölgəsinə hava hücumundan qorxaraq Əl-Küveyt xəstəxanasına sığınıb.
Yerli mənbələr də bildiriblər ki, sionist rejiminə aid qırıcılar qaçqınların sığındığı mənzil və məscidləri 40 dəfə hədəfə alıblar. Eyni zamanda sionist rejiminə aid artilleriyalar və döyüş qayıqları Rəfəh şəhərini dənizdən atəşə tutublar.
Sionist rejiminə aid qırıcılar Misir sərhədinə yaxın bölgələri də hədəf seçib.
Hesablamalara əsasən, təxminən 1.4 milyon Fələstin vətəndaşı sionist rejiminin geniş həcmli hücumlarına görə, çarəsiz qalaraq Qəzzənin şimalını tərk edib və cənuba, xüsusən də Rəfəhə sığınıb.
Dünən 129-cu gündə işğalçı rejimin Qəzzəyə qurudan, havadan və dənizdən olan hücumları davam edib. Dünənə kimi 28 176 nəfərdən çox insan şəhid olub və 67 784 nəfər isə yaralanıb. Hələ də minlərlə insan dağıntılar altındadır ya da küçələrdə qalıb. Çünki, işğalçı rejim onları xilas etməyə yaxud da təcili yardım maşınlarına köçürməyə qoymurlar.