Sionist hərbiçiləri 50-dən çox hərbi maşın və 4 ədəd buldozerlə İordan çayının qərb sahillərindəki Cenin şəhərinə hücum edib, fələstinlilərlə toqquşublar.
Xarici KİV-in verdiyi məlumata görə, bu hücumlar kəşfiyyat təyyarələrinin şəhərin üzərində uçuşu ilə eyni zamanda baş tutub. İşğalçı rejimin snayperçiləri bir sıra mənzil və binaların damında yerləşiblər. Cenin şəhəri və düşərgəsinin bir sıra məhəllələrinin elektriyi kəsilib.
İşğalçı qüvvələr, həmçinin Cenin xəstəxanasının ətrafında, Əz-Zəhra məhəlləsində, Dəxiliyyə meydanında və düşərgə ətrafında yerləşiblər.
Hücumdan sonra işğalçı sionist rejiminin buldozerləri Təvalibə məscidinin yaxınlığında, Əz-Zəhra məhəlləsində və düşərgəyə birləşən yolda infrastrukturları dağıdıblar. Bu arada Sinəma meydanının yaxınlığında, Nasirə yolunda və Bəsatin məhəlləsində də şiddətli münaqişələr baş verib.
Sionist hərbiçiləri, həmçinin snayperçiləri Əl-Ummal xəstəxanasının yaxınlığında yerləşdiriblər. Daha sonra təcili yardım maşınlarını saxlayaraq yoxlayıb və düşərgə ətrafındakı insanların evlərinə hücum ediblər.