Sionist ordusunun Qəzzə zolağına qarşı hücumlarının 35-ci günündə (10 Noyabr) bir neçə xəstəxana bu rejimə məxsus qırıcılarla bombalanıb. Bu cinayətin məqsədinin bütün müalicə mərkəzlərinin fəaliyyətlərinin dayanması və Qəzzədə insan fəlakətinin intensivləşməsi olduğu bildirilib.
Xarici KİV-in verdiyi məlumata görə, sionist rejimi ordusunun qırıcıları cümə günü səhərdən, yəni 10 Noyabr və Qəzzə zolağındakı cinayətlərin 35-ci günündən, bütün müalicə mərkəzlərinin xidmət dairəsindən çıxarılması üçün xəstəxanaların bombalanmasını gücləndiriblər.
TV kanal müxbirlərindən biri deyib: İşğalçı rejimə aid qırıcılar tərəfindən Qəzzə şəhərindəki Əş-Şifa Tibb Kompleksinin klinika binasının bombalanmasında bir sıra fələstinli şəhid olub və digər bir neçə nəfər isə yaralanıb.
Əş-Şifa xəstəxanasının direktoru “Muhəmməd Əbu Səlmiyyə” bu barədə deyib: İsrail səhər saatlarına yaxın bir vaxtdan indiyədək 4-cü dəfədir ki, Əş-Şifa xəstəxanasını hədəfə alır. İşğalçılar hal-hazırda Qəzzədəki xəstəxanalar və tibb sektoru ilə müharibədədirlər.
Sionist rejimi Noyabrın 10-u səhər Qəzzədəki bir neçə xəstəxananı yenidən bombalayıb. Qəzzə zolağındakı Səhiyyə Nazirliyi xəstəxanaların hədəf seçilməsi nəticəsində böyük fəlakətin baş verməsi barədə xəbərdarlıq etmişdi.
Əş-Şifa Tibb Kompleksi Fələstin Səhiyyə Nazirliyinə bağlı olan dövlət kompleksidir və Qəzzə zolağında tibbi xidmətlər göstərən ən böyük müalicə müəssisəsi sayılır.
Səhiyyə Nazirliyinin sözçüsü “Əşrəf əl-Qədrə” verdiyi müsahibədə sionistlərin tibb və müalicə sektoruna qarşı apardığı müharibə barəsində deyib: “İşğalçı İsrail rejimi Qəzzə zolağındakı bütün xətəxanaları sıradan çıxarmaq niyyətindədir”.
O, sözlərinin davamında vurğulayıb: “Beynəlxalq ictimaiyyət bu təcavüzləri dayandırmalı, yanacaq və tibbi ləvazimatları xəstəxanalara çatdırmalıdırlar. Bugün (10 Noyabr) səhər saatlarından indiyədək (müsahibə verilən vaxtadək) Qəzzədəki bir neçə xəstəxananın bomblanması nəticəsində şəhid olanlar və yaralananlar var.”
Bu vəziyyət təkcə Əş-Şifa xəstəxanasına hakim deyil. Fələstin mediyaları tərəfindən dərc olunan görüntülərə əsasən, Qəzzə şəhərindəki “Əl-Rantisİ”, “Ən-Nəsr” və “Əl-Uyun” xəstəxanaları da sionist rejimi ordusunun tankları tərəfindən mühasirəyə alınıb.
Xarici KİV-in bu barədə verdiyi hesabatda deyilir: İşğalçı rejimin tankları Qəzzədəki “Əl-Rantisİ”, “Ən-Nəsr”, bir psixoterapiya mərkəzi və göz xəstəxanasını mühasirəyə alıblar. Sionist hərbiçiləri bu xəstəxanaların ətrafını geniş şəkildə bombalamaqdadırlar və heç kəsin bu mərkəzlərdən çıxmağa cürəti yoxdur.
Bəzi xəbər mənbələri Qəzzə zolağından xəbər verirlər ki, işğalçı rejimin tankları və hərbiçiləri irəliləmək və Əl-Qəssam-ın əks-hücumlarının qarşısını almaq üçün Qəzzənin Ən-Nəsr məhəlləsindəki Əl-Rantisi xəstəxanasından, orada olan xəstələr və yaralılardan canlı qalxan kim istifadə edirlər.
İşğalçıların hədəf seçdikləri xəstəxanalardan biri olan Əl-Rantisi xəstəxanasının direktoru, uşaq mütəxəssisi verdiyi müsahibədə bildirib: Biz dünəndən xəstəxanada mühasirəyə alınmışıq və İsrail tankları ətrafda yerləşiblər.
O, deyib: Biz fəlakətin astanasıdayıq və hətta ən kiçik tibbi xidməti belə xəstələrə göstərə bilmirik. Biz beynəlxalq təşkilatlardan xəstəxanadakı xəstələri, zərər çəkmişləri və qaçqınları qorumalarını istəyirik.
Fələstin Səhiyyə Nazirliyi Noyabrın 8-i, çərşənbə günü bildirib ki, işğalçılar tərəfindən Qəzzənin ardıcıl olaraq 33 gün ərzində davamlı bombalanması 192 nəfər tibb işçisinin və həmçinin xilasedici qrupların 36 üzvünün şəhid olmasına səbəb olub.
Fələstin Qırmızı Aypara Cəmiyyəti də verdiyi müsahibədə bildirib: Qəzzə zolağının şimalındakı xəstəxanalar dərman və qida çatışmazlığından əziyyət çəkirlər.
Halbuki, Qəzzədə hər 10 dəqiqədən bir, 1 uşaq həyatını itirir. Həyatını itirənlərin 70%-i uşaqlar və qadınlardır. BMT-nin baş katibi “Antonio Quterreş” də bundan əvvəl bildirmişdi ki, Qəzzə zolağı uşaq məzarlığına çevrilməkdədir və Qəzzə kabusu humanitar böhrandan daha yuxarıdır. Bu, bəşəri bir böhrandır.