İşğal olunmuş torpaqlardakı sakinlər ardıcıl olaraq 23-cü həftədir ki, müxtəlif şəhərlərdə rejimin baş naziri və onun məhkəmə islahatları layihəsinə qarşı nümayişlər keçirirlər.
Ötən həftələrdə olduğu kimi bu şənbə də keçirilən nümayişlərin mərkəzi Tel-Əviv olub. Hesabatlara əsasən, on minlərlə insan bu nümayişlərdə iştirak edib.
Netanyahu və onun radikal kabineti iddia edir ki, sionist rejiminin məhkəmə sisteminin quruluşundakı dəyişiklik layihəsinin məqsədi qanunvericilik və məhkəmə sistemi arasında balans yaratmaqdır. Amma tənqidçilər bu arqumenti rədd edərək xəbərdarlıq edirlər ki, Netanyahu kabinetinin nəzərdə tutduğu dəyişikliklərin icra olunmasıyla, qeyri-məhdud güc kabinetin və icra hakimiyyətinin ixtiyarında olacaq.
Xarici KİV-in veridiyi məlumata görə, işğal olunmuş Fələstində şənbə günü keçirilən nümayişlər, sionist rejiminin rəhbəri İshaq Hersoqun vasitəçiliyi ilə Netanyahu kabinetinin müxalifətlə məhkəmə strukturundakı islahat layihəsi barəsində anlaşma üçün müzakirə apardıqları bir şəraitdə baş tutub. Amma hələ də bu müzakirələrdən konkret nəticə əldə olunmayıb.
Bundan əvvəl də 66 yaşlı sionist “Arnon Oşiri” Fransa xəbər agentliyinə verdiyi müsahibəsində Netanyahu əleyhinə nümayişlərin nəyə görə davam etməsini belə izah etmişdi: “ İsrailin diktaturaya çevrilməsi ehtimalının aradan getməsi vacibdir. Bu korrupsioner hökumət ölkə səviyyəsini üçüncü dünya ölkəsi səviyyəsinə endirmək istəyən qanun pozan insanlarla doludur.”