Sionist əsgərlərinin Beyt Ləhmdə Əd-Dəhişə düşərgəsinə hücumunun ardınca 14 yaşlı fələstinli bir yeniyetmə işğalçıların atdığı güllə ilə şəhadətə çatıb. Bu fələstinli yeniyetmə, baş nahiyəsindən gülləyə tuş gəlib.
Fələstin Səhiyyə Nazirliyi vurğulayıb ki, 14 yaşlı “Ömər Lütfü Xəmud”, həftənin bazar ertəsi günü sionistlərin hücumu zamanı yaralanıb və aldığı yaralar səbəbi ilə şəhid olub.
Onun şəhid olduğu xəbəri elan olunduğu vaxt paylaşılan videoda Əd-Dəhişə düşərgəsinin əhalisi “La ilahə illəllah, şəhid Həbibullah” şüarları səsləndiriblər.
Yerli mənbələr israilli əsgərlərin Əd-Dəhişə düşərgəsinə kütləvi hücumu və vətəndaşların evlərinə həmlə etmələri barədə xəbər veriblər. Bununla da fələstinlilər və sionistlər arasında toqquşma baş verib. Sionist əsgərləri fələstinli gənclərə tərəf göz yaşardıcı qazlar, səs bombaları və güllələr atıblar. Beləliklə, “Ömər Lütfü Xəmud” başından güllə yarası alıb. İsraillilər “Mahmud Səlah Həmaş” adlı 24 yaşlı bir gənci də həbs ediblər.